ДРялъул хIукуматалъул председателасул тIоцевесев заместитель Анатолий Карибовас тIобитIараб данделъиялда гIахьаллъана МВДя­лъулги, УГИББДялъулги, Рос­гвардиялъул Дагъистаналда бугеб управлениялъулги нухмалъулел. Гьениб бицана спортивияб гугариялъул рахъалъ Европаялъул чемпионаталде гьабулеб хIадурлъиялъул хIакъалъулъ.

Аслияб кIвар буссинабуна спорт­­сменазе санагIатал шартIал гIу­цIиялдеги, гьезие рега-рахъинеги, кваназеги, хIухьбахъизеги бакIал чIезариялдеги. Масала, гьоркьоса къотIичIого роржине руго Стамбулалдаги МахIачхъалаялдаги гьоркьор самолетал. Чемпионат тIобитIулел къоязда къазе руго Каспийскалъул цо-цо къватIал, ай транспорт хьвадизе биччазе гьечIо. «Каспий» санаторий хIадурго буго чемпионаталъул гIахьалчагIиги гьалбалги къабул гьаризе. Гьениб букIине буго тIадегIанаб хехлъиялъул Интернетги мобильнияб бухьенги.

Хадубги Анатолий Карибовас бицана гугариялъул рахъалъ чемпионат тIобитIулеб заманалда Дагъис­таналде рачIине ругин гIемерал гьалбалги. «Россиялъул регионаздасаги къватIисел улкабаздасаги рачIунел гIадамазе чIезаризе ккола санагIатал шартIал. Аслияб масъала буго гIумруялъе хIинкъигьечIолъи букIинаби, хасаб кIваркьезе ккола рацIцIалъи цIуниялде», — ян абуна Карибовас.

РФялъул МЧСалъул Дагъис­таналда бугеб управлениялъу­л начальникасул заместитель Мартин Маммаевас рехсана цIа ккеялдаса цIуниялъул рахъалъ агъаз гьабичIого ратарал гостиницаби. «ЧIахIиял гIунгутIаби гьечIо гьенир, амма тIатинарурал тIагIинаризе хIаракат бахъизе ккола», — ян лъазабуна гьес.

"ХIакъикъат" казияталдаса босараб