Нилъеца цебе бицун букIана кинаб къуватгун МахIачхъалаялъул футболалъул "Анжи" клуб премьер-лигаялъул цIияб сезоналде лъугьунеб бугебали. ГьанжелъизегIан рукIарал матчазда бихьана командаялъул мухъилъ цIар рагIарал футболистал гьечIониги нилъерал дивизионалъул гьоркьохъел клубаздаса хашго хIалел гьечIолъи. Экспертаз рикIкIунеб буго гьеб гIицIго "Анжия­лъул" тренер Александр Григоряница гьабулеб хIалтIул хIасил кколин, хъвалеб буго Темирхан ХIасановас "ХIакъикъат" казияталда.

Кинха хIараб "Анжи" ахирисеб хIаялда Москваялъул "Локомотив" командагун? КIиябго таймалда дандиязул кавабахъе кIиго-лъабго нухалда гурого гьужумго гьабичIо нилъераз. ТIубараб хIаялъго таргIида кверщел москваялъулаз гьабулеб букIана ва нилъеразул кавабахъе чанго гол кьабизе ресги букIана гьезул. ПалхIасил, 1:0 хIисабгун "Локомотивалдаса" нилъерал къуна. Гьеб хIаялда бихьана къуватал командабигун хIазе "Анжи" гьабсагIаталда хIадур гьечIолъи ва 2017-2018 соназул сезоналда нилъер командаялда цебелъураб аслияб масъалаги премьер-лигаялда хутIи букIин. "Локомотивалъулгун" букIараб мат­чалдаса хадуб тIобитIараб пресс-конференциялда МахIачхъалаялъул командаялъул тренер Александр Григоряница абуна жив "Анжиялъул" футболистаз бихьизабураб хIаялдаса рази гьечIин.

«Футболистасе чара гьечIого къваригIунеб гIамал ккола бихьинчилъи, къвакIи. Амма "Анжиялъул" гьужумалъулав Константин Базелюкица бихьизабуна жиндилъ гьеб гIамал гьечIолъи. Дандиязул кавабазда цеве живго цохIо вугониги гол кьабун бажарулеб гьечIони гьужумалъуласухъа гьесие тIокIаб кинаб къимат кьелеб? Майданалде вахъанщинав футболист вукIине ккола дандиял «кваналеб» хIалалда. Гьедин гьечIони футболалда бергьенлъаби щоларо», — ян абуна "Анжиялъул" тренерас.

Хадусеб туралда "Анжиялъ" Анжи-Аренаялда къабул гьабизе буго "Ростов" команда. Премьер-лигаялъул лъабго туралдаса хадуб туниралъул таблицаялда МахIачхъалаялъул команда буго 11-абилеб бакIалда.