ЗагIипго канлъи бихьулезда гьоркьоб Москваялда тIобитIараб самбоялъул рахъалъ Россиялъул чемпионаталда Дагъистаналдаса спортсменазе щвана батIи-батIиял даражабазул 13 медаль. Гьел къецазда гIахьаллъи гьабуна улкаялъул 23 регионалдаса 80 самбистас. Къецазул хIасилазда рекъон Дагъистаналдаса лъабго самбист вахъана Россиялъул чемпионлъун. Гьел ккола 57 килограмм цIайиялда бергьарав Шамил ГIисаев, СагIид Шахманов (62 кг) ва Зелимхан Суракъатов (82 кг), хъвалеб буго "ХIакъикъат" казияталда.

ГIарцул медалазе мустахIикълъана: Заур ЖабрагIилов (62 кг), ШагIбан Къурбанов (82 кг), Ислам Жалилов (90 кг) ва Малик Къурбанов (100 кг). Лъабабилел бакIал ва мазгарул медалал щвана ГIабдула МухIамадрасуловасе ва ГIумар ГIабдурахIмановасе (кIиявго — 68 кг), Шамил МухIамадовасе (82 кг), СагIаду ГIабдурахIмановасе, Айрат Халитовасе (кIиявго — 90 кг) ва Иляс МухIамадовасе (100 кг).

2002-2003 соназда гьарурал гIолилазда гьоркьоб рагъулаб самбоялъул рахъалъ Санкт-Петербургалда тIоритIарал Россиялъул къецазда гIахьаллъана Россиялъул 14 регионалдаса 174 спортсмен. Дагъистаналдаса вакилзабазе гьениб щвана ункъо медаль. Россиялъул чемпионлъун вахъана ГIабдулхаликъ Эсенбулатов (68 кг), гIарцул медалалъе мустахIикълъана ЖабрагIил МуртазагIалиев (57 кг). Мазгарул медалал щвана МухIамад Шарухановасе (40 кг) ва Арсен Надировасе (48 кг).