Милана Дадашева гьаюна 1995 соналда Избербашалда. Гьезул хъизан МахIачхъалаялде гочун хадуб, гьей машгъуллъана дзюдоялде. ГьитIинаб къоялдаса нахъе бокьулаан гьелъие спорт, амма Миланаца тIасабищана эркенаб гугари. 2016 соналда 48 кг цIайиялда гьей яхъана Россиялъул чемпионкалъун. ГIолохъанго йикIаниги, гьелъие кьуна "Халкъазда гьоркьоб классалъул спорталъул мастер" абураб цIар, хъвалеб буго "ХIакъикъат" казияталда.

ТIоцебе шагьаралъул турниралда бергьун хадуб эркенаб гугари гьелъие лъугьана кIудияб спорталде гали тIамулеб ареналъун. Миланае гугариялъул махщел щвана МахIачхъалаялъул ДЮСШалда, Россиялъул цIар рагIарав тренер Къасум Насрудиновасул нухмалъиялда гъоркь. Хадуб, дагьал кIудиял гугарухъабазул къокъаялде ккедал, гьелъул тренер йикIана Светлана Грачева. ГIолохъанай спортсменкаялъул тIубараб махщел рагьизе кумек гьабуна гьелъ.

2012 соналъул апрелалда Оренбургалда тIобитIараб Россиялъул юниоразул чемпионаталда Дадашевалъе мазгарул медаль щвана. Гьелъул хIасилалда, гьей ячана улкаялъул гIолилазул тIасабищараб командаялде. 2012 соналъул маялда Турциялъул Анкара шагьаралда тIобитIараб гIолилазул турниралда Миланае меседил медаль щвана. Гьебго соналъул риидал Загребалда тIобитIараб Европаялъул чемпионаталда гьей мустахIикълъана мазгарул медалалъе.

2015 сонги букIана Дадашевалъе битI бугеблъун. Июлалда гьей бергьана Истамбулалда юниоразда гьоркьоб тIобитIараб континенталияб чемпионаталда. Гьебго соналъул августалда Бразилиялда юниоразда гьоркьоб тIобитIараб дунялалъул чемпионаталда гьелъ босана мазгарул медаль.

2016 соналда чIахIиял спортсменазда гьоркьоб тIобитIараб Россиялъул чемпионаталда Дагъистаналдаса гугарухъаналъ киналго дандиязул мугъ ургуялда цузабуна. Гьеб букIинчIо тохлъукьегояб ишлъун, щайгурелъул гьеб чемпионаталде Милана лъикI хIадурлъун йикIана. Амма гIемерисел тренерал ва экспертал гьелда хIикмалъун рукIана. Гьебмехалъ гьелда бичIчIана Бразилиялда Олимпиялъул хIаязда 48 кг цIайиялда гIахьаллъизе йигей Россиялъул тIасабищараб командаялъул вакил жий йикIине йигеблъи. Олимпиялъул хIаязда гIахьаллъана, амма медаль щвезе Миланае хъван букIун гьечIо.