МахIачхъалаялда "Труд" стадионалда тIобитIана журналист АхIмаднаби АхIмаднабиев ракIалдещвеялъул хIурматалда спартакиада. Гьелъул гIахьалчагIазул къеркьей букIана 10 батIияб спортивияб тайпаялда, хъвалеб буго "ХIакъикъат" казияталда.

МахIачхъалаялъул ветераназул командаялъул волейболист Камил ХIусенов ккола гьеб спартакиадаялъул кидагосев гIахьалчи. "Гьаб спортивияб байрам соналдаса соналде машгьурлъулеб буго ва росуцоязе рес кьолеб буго дандчIвазе, лъай-хъвай гьабизе ва гара-чIваризе", — ян абуна Камилица.

Росуцоязда гьоркьоб щуабилеб спартакиада гIуцIана "КIаратIа" Дагъистаналъул регионалияб жамгIияб цолъиялъ.
"Командабазулал къецазул кIиго тайпа — футбол ва волейбол тIобитIула, хутIарал хасал тайпаби — чIорбутI речIчIи, пневматикияб туманкI кьвагьи, шашкаби хIай, 400 метралъ рекери, гиряялъулаб спорт букIуна", — ян абуна "КIаратIа" ДРООялъул председатель ХIайбула ХIайбулаевас. Къецал рагьиялъул тадбиралда ГIахьвахъ районалъул бетIерас диплом кьуна Дагъистаналъул Аграрияб пачалихъияб университеталъул ректор Зайдин Жамбулатовасе, гьединал спортивиял байрамал гIуцIизе кумек гьабуралъухъ.