Гъизилюрт шагьаралъул Бавтугъай поселокалъул З. А. МухIамадовасул цIаралда бугеб спорткомплексалъуб Афгъанистаналда хъулухъ гьабурал рагъухъаби-интернационалистазул ва ВатIан цIунулезул къоялъул хIурматалда гIолилазда гьоркьоб тIобитIана волейболалъул рахъалъ республикаялъулаб турнир. Къецазда гIахьаллъана Гъизилюрт шагьаралъул, Казбек ва Буйнакск районазул, Тарумовка районалъул Кочубей поселокалъул командаби.

Турнир рагьиялъулъ гIахьалъи гьабурал Гъизилюрт шагьаралъул №1 ДЮСШалъул директор ХIусейн ЧIегIераевас, къецазул бетIерав судья ХIасан НурмухIамадовас; Бавтугъай поселокалъул №2 СОШалъул директор, Гъизилюрт шагьаралъул ЖамгIияб палатаялъул член Асият Шагьрудиновалъ; Гъизилюрталъул цолъизабураб отделениялъул Афгъанистаналъул Ветераназул советалъул председатель Рамазан ГIалиевас бицана рагъухъаби-интернационалистаз къадруялда тIубазабунин рагъулаб борч, бихьизабунин бахIарчилъи ва рагъухъабазда гьоркьор камиялги кканин. "ГIумруялда барахщичIого, гьенир бахIарчиго хварал дагъистаниял нилъеда кидаго кIочене бегьуларо. Нилъ гьанжеги рукIине ккола къуваталлъун ва кинабго гьабизе ккола рекъел цIуниялъе гIоло. Дол рагъулал лъугьа-бахъиназул гIахьалчагIи ракIалдещвеялъе гьадинал турнирал ва цогидалги спортивиял къецал щибаб соналда тIоритIизе руго. ГIолохъанаб гIелалда ракIалда рукIине ккола жидер ВатIан цIунарал бахIарзал", — ан абуна кIалъазе рахъараз.

ХIалуцарал къецазул хIасилазда рекъон, турниралъул чемпионлъун бахъана Гъизилюрт шагьаралъул команда (командаялъул капитан Мажид ТIайгибов). Гьелъие кьуна Кубок, грамотаби ва медалал. КIиабилеб бакI щвана Буйнакск ва лъабабилеб — Казбек районазул командабазе. Турниралъул призеразеги кьуна грамотаби ва медалал.
ГIалибег Салаватов