Каспийскалда ГIали ГIалиевасул цIаралда бугеб спортивияб кIалгIаялъуб, 11-12 февралалда, эркенаб гугариялъул рахъалъ Дагъистаналдаса Олимпиялъул тIоцевесев чемпион Загъалав ГIабдулбеговасул призалъе гIоло тIобитIараб Дагъистаналъул чемпионаталда гIахьаллъана 200 гугарухъан.

Къецал рагьулаго, гьелъул гIахьалчагIазе ва гьалбадерие республикаялъул нухмалъулезул рахъалдасан саламги кьун, ДРялъул хIукуматалъул председателасул тIоцевесев заместитель Анатолий Карибовас абуна республикаялда ва улкаялда цере Загъалав ГIабдулбеговасул кIудиял спортивиял тIокIлъаби ругилан ва гIолохъанаб гIел ахIана цIар рагIарав спортсменасдаса мисал босизе.

"Нилъеда, дагъистаниязда, кидаго кIоченаро 1972 соналда Мюнхеналда тIоритIарал Олимпиялъул хIаязул чемпионлъунги вахъун, гьев тIадвуссараб заман. Гьеб бергьенлъиялъ кIудияб квербакъи гьабуна Дагъистаналъул атлетазул махщел борхизабиялъе. Хадусел гIелазул спортсменаз хIаракат бахъана гьесда ращалъизе. Пачалихъияв тренерасул хъулухъалда вукIарав Загъалав ГIабдулбеговасул тIадчIараб захIматалъулги спорталъул цогидал специалистазул цадахъаб хIалтIулги хIасилалда, республикаялъе щвана кIудияб машгьурлъи. 40-ялдаса цIикIкIун сонал руго гьес "Динамо" спортивияб жамагIаталъе лъикIал хIасилалгун нухмалъи гьабулелдаса", — ян бицана Карибовас.

Вице-премьерас ракIчIей загьир гьабуна чемпионат тIадегIанаб даражаялда ине ва эркенаб гугари машгьурлъиялъе гьелъ квербакъизе букIиналда. Чемпионат рагьулаго, кIалъазе рахъана Дагъистаналъул бетIерасул гIакълучи Жамалудин ГIумаров ва ГIахьвахъ районалъул бетIер МухIамадзагьид Муслимов. Хадуб кIалъай гьабурав Загъалав ГIабдулбеговас баркала загьир гьабуна жиндир цIаралда абурал лъикIал рагIабазухъ ва гугарухъабазе гьарана лъикIал хIасилал.

ТIоцебесеб къоялъ чемпионаллъун рахъана МахIачхъалаялдаса Муршид МутIалимов (65 кг) ва Хасавюрталдаса Саид ГъазимухIамадов (57 кг), Адам Оздарбиев (61 кг) ва Шамил Мусаев (97 кг).

"ХIакъикъат" казияталдаса босараб