Лъабабилеб-щуабилеб февралалда Каспийскалда ГIали ГIалиевасул цIаралда бугеб спортивияб кIалгIаялъуб тIобитIана машгьурав политикияв ва жамгIияв хIаракатчи ХIамид ХIамидов ракIалдещвеялъе гIолилазда гьоркьоб эркенаб гугариялъул рахъалъ ХХ Дагъистаналъул рагьараб чемпионат.

Турнир рагьиялъул тадбиралда гIахьаллъи гьабуна ДРялъул хIукуматалъул председатель ГIабдусамад ХIамидовасги. Гьес спортсменазе, судьябазе ва гьенир данделъаразе баркала загьир гьабуна ХI. ХIамидовасул хIурматалда, гьев ракIалдещвезавун тIобитIулеб чемпионаталда гIахьаллъаралъухъ, хъвалеб буго "ХIакъикъат" казияталда.

Чемпионаталда гIахьаллъана республикаялдаса 300-ялдаса цIикIкIун гугарухъан. Чемпионаллъун рахъана: Хасавюрталдаса М. Дагиров (42 кг), Д. ГIамирханов (46 кг), И. Ганишев (54 кг) ва махIачхъалаялъулал — И. АбутIалимов (50 кг), А. АхIмадов (58 кг), ГI. ГIабдулаев (63 кг), М. Ибрагьимов (69 кг), М.-Р. Расулов (76 кг), Р. Шабанов (85 кг), А. МухIамадов (100 кг) ва ХI. Къебедов (120 кг).