Январалъул ахиралда Красноярскиялда тIобитIана эркенаб гугариялъул рахъалъ XXVIII халкъазда гьоркьосеб турнир. Гьелда гIахьаллъана 17 улкаялдаса 200-ялдасаги цIикIкIун гугарухъан. Лъабго къоялъ халатбахъараб къеркьеялда щуго цIайиялда Дагъистаналъул гугарухъаби чемпионаллъун рахъана.

Меседил медалазе мустахIикълъана Заур Угуев (57 кг), АхIмад Чакаев (61 кг), Иляс Бекбулатов (65 кг), АхIмад ХIажимухIамадов (74 кг), Даурен Куруглиев (86 кг). Артем Гебековасе (57 кг), ХIажимурад Рашидовасе (61 кг) ва Расул МухIамадовасе (97 кг) щвана гIарцул медалал. Мазгарул медалазе мустахIикълъана Зелимхан Абакаров (57 кг), Нариман Исрапилов (57 кг) ва МухIамадхIабиб КъадимухIамадов (70 кг). Ясазул турниралда 48 килограмм цIайиялда лъабабилеб бакI щвана Милана Дадашевалъеги.

Иван Ярыгинил цIаралда бугеб исанасеб турниралда Дагъистаналъул тIасабищараб гугарухъабазул командаялъул хIасилал, цересел соназда тIоритIарал киналго турниразда рукIараздаса лъикIал ккана.

"ХIакъикъат"