Иван Ярыгинил мемориал тIобитIулеб буго 28-абилеб нухалда
Дагъистаналъул хIукуматалъул председатель ГIабдусамад ХIамидов физкультураялъул ва спорталъул министр МухIамад МухIамадовгун цадахъ щвана эркенаб гугариялъул рахъалъ Дагъистаналъул тIаса бищараб командаялъул тренировкабазде. Гугарухъаби хIадурлъулел рукIана Красноярскиялда тIобитIизе бугеб Иван Ярыгинил цIаралда бугеб халкъазда гьоркьосеб турниралда гIахьаллъизе.

Тренировкабазулаб сбор гугарухъабаз тIобитIана МахIачхъалаялда Олимпиялъулаб хIадурлъиялъул централда.
ГIабдусамад ХIамидовас спортсменазе салам кьуна ва республикаялъул бетIер Рамазан ГIабдулатIиповас гьезие нухбитIиялъе абурал рагIаби рехсана. Гьес бихьизабуна нилъер тIаса бищараб командаялъе гьеб къадруяб турниралъул кIудияб кIвар букIин. Гьес гугарухъабазда абуна турниралда унго-унгоял спортивиял ва инсанасулал хасиятал рихьизаризе кколин ва гьезие бергьенлъаби щвей мурад букIин загьир гьабуна.

Республикаялъул хIукуматалъул председателас бихьизабуна Дагъистаналъул гугарухъабазе гьеб турниралъул кIудияб кIвар букIин. "Дагъистаналъул тIаса бищараб командаялда кIудияб конкуренция буго — щибаб цIайиялъул категориялда вуго лъабго-ункъо лъикIав гугарухъан. Узухъда, турниралда меседил медалал росизе киназдаго кIвеларо, амма бергьенлъиялъул хIокIиде вахъине нужер щивасухъа бажаризе букIиналда божула. Кинабго бараб буго нужедаго, спортивияб хасияталда, бергьенлъиялде бугеб шавкъалда, махщалида, хIадурлъиялъул даражаялда. Нижеца кидаго кIвар кьун халккола нужер церерахъиназда хадуб, киналго хIадурал руго нужер рахъкквезе ва кидаго хьул букIуна нуж бергьиналде", — ян абуна ГIабдусамад ХIамидовас. Гьебго заманалъ Дагъистаналъул хIукуматалъул председателас абуна, тIаса бищараб командаялъул тренеразулаб штабалъул ва гугарухъабазул хIажатаб рахъкквей кидаго букIине бугилан.

"Щибаб соналда нилъер команда гьел къецазда бищунго къадруяблъун букIуна ва гьезда гIахьаллъи гьабула бищунго цIикIкIараб къадар гугарухъабаз. Кидаго лъикIаб асар гьабула турниралъул хIасилазда рекъон, нилъер гугарухъабазе командаялъулаб тIоцебесеб бакI щолеб букIиналъ", — ан абуна ГI. ХIамидовас. Исанасеб турниралдасаги команда бергьенлъиялда тIадбуссине букIиналда ракIчIей загьир гьабуна республикаялъул спорталъул министр МухIамад МухIамадовас.

ТIасабищараб гугарухъабазул командаялъул бетIерав тренер Сажид Сажидовас ГIабдусамад ХIамидовасе ва МухIамад МухIамадовасе баркала загьир гьабуна гугарухъабазде кIвар кьуралъухъ ва гьезул рахъкквеялъухъ. Гьес ракIчIей загьир гьабуна, Красноярскиялда республикаялъул вакилзабилъун рукIине ругел гугарухъабаз, мустахIикъаб къагIидаялъ цере рахъине ва жидерго болельщикал рази гьаризе хIаракат бахъине букIиналда.