Гьеб тадбиралда гIахьаллъи гьабурав республикаялъул хIукуматалъул председатель ГIабдусамад ХIамидовас, Дагъистаналъул бетIер Рамазан ГIабдулатIиповасул ва ДРялъул хIукуматалъул цIаралдасан саламги кьун, гьадин абуна: "Гъоркьисала сон букIана ХХХI риидалил Олимпиялъул хIаязул лъагIеллъун. Гьениб Дагъистаналъул спортсменаз цоги нухалда тасдикъ гьабуна жидерго къадру. Гьел мустахIикъаб къагIидаялъ цере рахъана Олимпиадаялда ва гьеб бергьенлъиялъ иргадулаб нухалъ нугIлъи гьабулеб буго нилъер улкаялъул гучалъе, халкъалъул тавакалалъе, цIиял бергьенлъабазул тIогьире рахине бахъулеб хIаракаталъе. Хасго нилъ рохараб иш ккола Россия машгьур гьабурал спортсменазда гьоркьор дагъистаниялги рукIин. ГIадада гуро нилъер ракьцоясе Гьудуллъиялъул орден кьолаго РФялъул президентас ГIабдулрашид СагIадулаевасул тIокIлъабазул хасгьабун рехсараб.

Дагъистаналъул спортсменазе гьениб щвана 10 медаль, гьездаго гьоркьоб кIиго меседил, цо гIарцул ва анкьго мазгарул. Нилъеда киназдаго лъала гьединаб даражаялъул бергьенлъаби бигьаго щолареллъи. Гьелъие гIоло щивав хIалтIана тIадчIун, цебелъураб мурадалде щвеялъе.
Жакъа гьанир данделъарал спортсменал ва тренерал ккола жидерго ишалъул тIадегIанал спортивиял хIасилал ккеялъе чIахIиял ресал рукIин рихьизарурал унго-унгоял мастерал, ВатIаналъул патриотал. Нилъ чIухIарал руго дунялалда бищунго къадруял хIаязда дагъистаниязда бергьенлъаби росизе кIвеялдаса".

Хадуб шапакъатал кьуна лъикIал хIасилал рихьизарурал спортсменазе ва гьезул насихIатчагIазе. Дагъистаналъул бетIерасул цIарчIварал кубокал кьуна ГIабдулрашид СагIадулаевасе ва РФялъул мустахIикъав тренер Шамил ГIумаровасе.

ДРялъул Физкультураялъул ва спорталъул министерствоялъул рахъалдасан кубокал кьуна ТIолгороссиялъул Паралимпиялъул хIаязда бергьаразе ва призеразе, гьединго юниоразда гьоркьор тIоритIарал чемпионатазул призеразе.

Гьенибго ДРялъул хIукуматалъул председатель, республикаялъул Спортивияб гугариялъул федерациялъул президент ГIабдусамад ХIамидовасеги кьуна министерствоялъул рахъалдасан ракIалдещвеялъулаб кубок.