Каспийскалда ГIали ГIалиевасул цIаралда бугеб спортивияб кIалгIаялъуб гъоркьисала 31 декабралда тIобитIана ветераназда гьоркьоб ЦIияб соналъулаб республикаялъулаб турнир.

Гьеб гIуцIун букIана ДРялъул бетIер Рамазан ГIабдулатIиповасул жигарчилъиялдалъун. Лъабабилеб бакIалъе гIоло хIана Югалъулаб Дагъистаналъул ва Гъизилюрт районалъул командаби, 2:0 хIисабгун бергьана Гъизилюрталъул волейболистал. Турниралъул чемпионлъун бахъана, 2:1 хIисабгун МахIачхъалаялъул тIасабищараб командаялдаса бергьараб, ДРялъул бетIерасул команда. Къецазул гIахьалчагIазе кьуна ракIалдещвеялъе медалал, грамотаби ва кубокал.

Баркиялъул рагIабиги абун спортсменазде ва болельщиказде хитIаб гьабулаго, регионалъул бетIерас абуна гIемер чи гIахьаллъулеб спорт цебетIезабиялъул кIудияб кIвар бугилан, ва ДРялъул Волейболалъул федерациялъ баркала загьир гьабуна гьел хIаял гIуцIаралъухъ.

"ХIакъикъат" газетаялдаса босараб