РечIчIухъабазул аслияб UFC лигаялда НурмухIамадовас иргадулаб бергьенлъи босана

12 ноябралда Нью-Йоркалда UFC 205 речIчIухъабазул турниралда НурмухIамадов ХIабибица ракIчIараб бергьенлъи босана Америкаялъул спортсмен Майкл Джонсонида тIад.

Американасда тIад босараб бергьенлъиялдаса хадуб ХIабибица лъазабуна жиндие Конор Макгрегоргун къеркьезе рингалде вахъине бокьун бугилан. UFCялъул президент Дан Уайтидаса гьес тIалаб гьабуна жиндихъе чIорогоял контрактал ритIугеян. Американасда тIад босараб бергьенлъиялдаса хадуб ХIабиб ккола тIадагьаб цIайиялда UFCялъул чемпионасул титулалъе гIоло къеркьезе рингалде вахъине рес бугев тIоцевесев речIчIухъан. Гьеб шоуялда аслияб къеркьей букIана тIадагьаб цIайиялда UFCялъул чемпион Эдди Альваресида ва Конор Макгрегорида гьоркьоб. Гьенив бергьана Макгрегор. Эдди Альваресгун UFCялъул чемпионасул рачелалъе гIоло къеркьезе кколаан ХIабиб НурмухIамадов. Балъголъи гуро UFCялъул президент Дан Уайтица гьелъул хIакъалъулъ цебеккун лъазабун ва гьеб рагъуе контракталда ХIабибица гъолбас гьабун букIараблъи. Амма ахирисеб лахIзаталъ лъазабуна гьеб рагъ тIобитIизе гьечIилан. Щай гьедин ккарабали "Матч ТВялъе" кьураб интервьюялда гьадин бицана тренер ва ХIабибил эмен ГIабдулманап НурмухIамадовас.

"Гьениб суал букIана Макгрегорица ва Альваресица цоцазулгун къеркьеялъухъ цIакъго кIудияб багьа абулеб бугин. ХIабибихъе контракт битIулаго рагъул гIаммаб багьа UFCялъ дагь гьабуна ункъо миллион долларалъ. ХIасилалда гьев кIиясего гонорарал дагь гьаруна кIиго нухалъ. Цо-цоязул харбазда рекъон гьеб речIчIиялъухъ Макгрегорие бокьун букIана анлъго-анкьго миллион, Альваресие — цо миллион доллар. Гьеб лахIзаталда ХIабибихъе битIана кIиго контракт ва гьес гьезда гъолбасал гьаруна. Макгрегор ва Альварес гьелдаса хадур гIодориччана. Щайгурелъул, ХIабибгун рагъизе лъиениги бокьун букIинчIелъул. ХIасилалда, Альваресие чIезабуна 500 азарго доллар, Маркгрегорие — 3,5 миллион доллар.

Рагъ тIобитIичIолъиялъухъ ХIабибие кьолеб букIана компенсация хIисабалда 100 азарго доллар. Гьев гьелда разилъичIо ва абуна: "Дие рес кье рингалда вагъизе", — ян. Гьебго сордоялъ ХIабибида абуна добго гонораргун Майкл Джонсонгун къеркьезе рингалде вахъаян. Гьев разилъана". Джонсонилгун дандчIваялда ХIабибица бихьизабуна унго-унгояб къеркьей. "ЦIудуе" (гьеб буго ХIабибие кьураб тIокIцIар) тIадегIанаб къимат кьуна букмекеразги ва гьесул бергьенлъиялъе лъуна 1,3-ялда бащадаб коэффициент.

Гьеб къеркьеялда лъабабго раундалда тIокIлъи букIана ХIабибил. Ахирисеб раундалда дагъистанияс Джонсоние унтизабулеб прием гьабуна къеркьей лъугIизе кIиго минутгун 29 секунд хутIараб мехалда ва гьев къеялъе мукIурлъана, бергьенлъи ХIабибие кьуна. Гьелдаса хадуб ХIабиб НурмухIамадовас UFCялъул чиновниказда гьарана жиндие чемпионасулаб рачелалъе гIоло къеркьезе рес кьеян. ЦIумада районалъул Силди росулъ гьавурав 28 сон барав речIчIухъан ХIабиб НурмухIамадов ММАялда цониги нухалъ къечIо. Рингалда гьев бергьана 24 дандчIваялда, гьезул 15-ялда — аслияб заман лъугIилелдего.

"ХIакъикъат" газетаялдаса босараб