МахIачхъалаялъул командаялъул кадрабазул рахъалъ руго церего гIадинал масъалаби: цересел хIаязда ккарал ругънал сах гьарулел лазареталда вуго анкьго футболист — Яковлев Павел, Хадарцев Батраз, Мкртчян Карлен, Обертан Габриэль, ГъазимухIамадов Анвар, Каретник Сергей ва Рабиу МохIаммад.

Цересел къоязда Россиялъул кубокалъе гIоло хIаялда "Зениталда" тIад "Анжиялъ" босараб бергьенлъиялдаса хадуб, гьелъул болельщиказул, гьайгьай, анищ букIана чемпионаталъе гIоло хIаялдаги команда бергьиналде. Амма гьезул анищ тIубачIо. ХIаялъул 17-абилеб минуталда "Анжиялъул" гьужумалъулав Беришада данде хъачIго хIаялъе гIоло, цебехунги цо тIогьилаб карточка букIарав "Краснодаралъул" футболист Кабарее бихьизабуна кIиабилебги. Гьелъ "Анжиялъул" масъала бигьа гьабилин кканиги, лъикIаб защитаялда рукIарал краснодаралъулазул кавабахъе торгIо кьабизе гьезухъа бажаричIо.

ТIоцебесеб таймалда гьелъие лъикIаб рес букIана гьалбадерил кавабазда аскIоб гьужум гьабурав Беришал. Амма "Краснодар" хвасар гьабуна гьезул голкипер Крицюкица. Гьеб таймалъул ахиралда "Анжиялъул" кавабаздехун гьужум гьабуна Краснодаралъул футболистазги. ГIакIадулаб майданалдаса Петровас кьабураб торгIо нахъчIвана "Анжиялъул" голкипер Беленовас.

КIиябго таймалда хIасил ккечIел гьужумал рукIана кIиябго командаялъул ва хIай лъугIана 0:0 хIисабгун.
"Х1акъикъат" казияталдаса босараб