Дагъистаналдаса речIчIухъан Аскар Аскаров журарал единоборствабазул рахъалъ АСB турниралда дандчIвана Бразилиялдаса спортсмен Хосе Мария Тоумагун. Щуабилеб раундалде щвезегIан кIвана дагъистаниясда бразилиялъуласда дандечIей гьабизе ва ахириселда нилъерас дандиясда тIад бергьенлъи босана.

Гьев ругьун гьавулеб ГIумаханов Шамилил цIаралда бугеб Хасавюрталъул спортивияб школалъул директорасул заместитель Сайпудин ГIалиасхIабовас бицана: "Нижер спортивияб школалдаса гIолилаз батIи-батIиял спортивиял тайпабазда кидаго лъикIал хIасилал рихьизарула. Цого цо гугари букIана гьаниб цо заманалда цебетIураб спортивияб тайпалъун. Гьанжейин абуни къойидаса къойиде машгьурлъулел руго журарал единоборстваби. Гьединлъидал нижеца яхI бахъулеб буго гьеб спортивияб тайпаялъул рахъалъ ругьун гьарулел атлетазе лъикIал шартIал чIезаризе. Гьеб мурадалда школалъе дагьаб цебегицин босана хIажатаб алатгун спортивияб экипировка",-ян абуна гьес.

"ХIакъикъат" газетаялдаса босараб