15-16 октябралда Хасавюрталъул ХIамид ХIамидовасул цIаралда бугеб спортивияб кIалгIаялъуб тIобитIана эркенаб гугариялъул рахъалъ Континентазда гьоркьосеб кубокалъе гIоло турнир. XIX-XX гIасрабазул машгьурал гугарухъаби ракIалдещвеялъе тIобитIараб гьеб турниралда гIахьаллъана Россиялъул регионаздаса, гьединго Азербайжаналдаса, Казахстаналдаса, Украинаялдаса, Белоруссиялдаса, Польшаялдаса ва СШАялдаса 150 гугарухъан.

Турнир рагьулаго, спортсменазе, гьалбадерие ва болельщиказе саламги кьун, гьезде хитIаб гьабуна Дагъистаналъул физическияб культураялъул ва спорталъул министр МухIамад МухIамадовас.

«Континентазда гьоркьосеб кубокалъе гIоло эркенаб гугариялъул рахъалъ къецал тIоритIана микьабилеб нухалъ. Цере гьел тIоритIулаан цIар рагIарав гугарухъан Шамил ГIумаханов ракIалдещвеялъе. Хасавюрталъулал турниразда гIахьаллъун Дагъистаналъул гIемерисел гугарухъабазе щвана лъикIаб хIалбихьи. Хадубккун гьел гугарухъаби рахъана дунялалъул, Европаялъул, Олимпиялъул хIаязул чемпионаллъун ва призераллъун. Гьел къецал кидаго тIоритIулаан тIадегIанаб гIуцIиялъулаб даражаялда ва гIахьалчагIазул рекIелъ гIемерал соназ хутIулаан лъикIал ракIалдещвеял. Гьарула гугарухъабазе бергьенлъаби ва балагьаразе берцинаб гугари. Риччанте бергьине бищунго къуватал», — ан абуна министрас.

Хасавюрталда турнир тIобитIиялъул кIваралъул бицана шагьаралъул бетIер Зайнудин Охъмазовас: "ЛъикIаб иш ккола гьаб турнир нижер шагьаралъ 85 сон тIубалеб лъагIелалъ тIобитIулеб букIин. Дица рикIкIуна гьаб турниралда гIахьаллъи щивав гугарухъанасе хIурматияб иш бугилан. Халкъазда гьоркьосеб кубокалъе гIоло къецал ккола хадубккун бищунго къадруял къецазул чемпионаллъун рахъарал спортсменазе байбихьулаб майданлъун.

РакIчIарав вуго халкъазда гьоркьосеб кубокалъул шапакъатазе гIоло жакъа къеркьолел гугарухъабазда гьоркьорги ругин хадур дунялалъул ва Европаялъул чемпионаллъун рахъинесел спортсменал рукIиналда. Гьаб турниралъул ва Олимпиялъул хIаязул тIадегIанаб хIокIиде рахарал нижер гугариялъул школалъул къебелъухъ тарбия щварал спортсменазул хIаракаталъул хIакъалъулъ лъана дунялалъул гIемерал бакIазда. Гьарула киназего икъбал ва бергьенлъаби".

Россиялъул Спортивияб гугариялъул вакил Шамил Невретдиновас бихьизабуна Дагъистаналъул гугариялъул школа дунялалдаго аслиязул цояблъун кколилан. "Дагъистаналъул эркенаб гугариялъул школалъул бергьенлъабазул лъала тIолабго дунялалда. КъватIисел улкабазул гIемерисезул анищ буго халкъазда гьоркьосеб даражаялда Дагъистаналъул гугарухъабазе щварал гIадинал тIадегIанал хIасилал щвеялде. Ахирисеб Олимпиадаялдаги Дагъистаналъул гугарухъабаз бихьизабуна тIадегIанаб махщалил гугари. Дагъистаналъул вакилзабаз машгьур гьабуна цохIо Россия гуребги, нилъер гугарухъаби жидее гIоло цере рахъарал цогидал улкабиги", — ян абуна Невретдиновас.

Гьел кIалъаяздаса хадуб ургуялде рахъана 57, 65, 74, 97 килограмм цIайиязул гугарухъаби. Гьезул лъабгоялда бергьана Дагъистаналъул гугарухъаби: Заур Угуев (57 кг), Иляс Бекбулатов (65 кг) ва ХIажи Набиев (74 кг). Цо меседил медаль щвана Чачаналдаса гугарухъан АхIмад Батаевасе (97 кг). Ургуялъул бетIергьаби — хасавюрталъулазе щвана лъабго меседил, кIиго гIарцул ва ункъо мазгарул медалал.

Къецал тIоритIараб кIиябго къоялъул хIасилазда рекъон, Дагъистаналъул гугарухъабазе щвана щуго меседил, кIиго гIарцул ва ункъо мазгарул медалал. КIиабилеб къоялъ чемпионаллъун рахъана: Разамбег Жамалов (61 кг) ва МухIамад КъурбангIалиев (70 кг).
"Хасавюрт шагьар" МОялъул администрациялъул пресс-хъулухъ
Гьумер хIадур гьабуна ГIабдула Хазамовас.