"Шахматазул школа рагьиялъул пикру дилъ бижизабуна цо цIалдохъанасул инсуца, республикаялда машгьурав тохтурас. Гьайгьай, гьеб лъикIаб пикру букIаниги, дирго щаклъи букIана хасав чи бетIергьанаб шахматазул школалде вачIунев чи вукIинадайилан. БукIаниги, дица хIукму гьабуна хIалбихьизе ва 2011 соналъул октябралда школа рагьизе ижараялъе мина босана ва гьенир хIажатал шартIал гIуцIана. Цинги балагьун чIана школалде щив вукIаниги вачIинадайилан. Дунго хIикмалъана шахматал хIазе рачIине бокьарал гIемерал ратиялъ ва моцIидасан, гIезегIан чагIи гьенире рачIиндал, гIумруялъул соназде балагьун гьезул къокъаби гIуцIана", — ян бицана "Дагъистан" РИАялъул мухбирасулгун букIараб гара-чIвариялда Ж. Жакаевас.

Школалъул директорасул рагIабазда рекъон, гьабсагIат гьенив цIалулев вуго ункъо соналдаса 13-ялде щвезегIан гIумру бугев 60-гIан шахматист. Гьезда гьоркьор руго шагьаралъул ва республикаялъул турниразда бергьарал ва призерал, ЮФОялъул турниразул гIахьалчагIи.

"Байбихьуда нижеца масъала лъун букIинчIо лъималазул цIикIкIараб къадар школалде босизе. Къокъаби кIудиял гьечIо — микьго лъимер ва щибалъе хасал малъа-хъваял рукIуна. Гьеб школалде лъимал къабул гьарула, дарсал кьола тренер Макъсуд Жамбулатовас. ТIоцебесеб кIиго соналда нижеца аслияб кIвар лъималазул логикияб пикру гьаби цебетIеялде, ругьунлъиялъе гьезие пайдаяб къагIида батиялде кьолеб букIун батани, гьанже шахматаздехун унго-унгояб рокьи бугел лъималазе нижеца кумек гьабула гьезул тIадегIанал хIасилал ккеялъул мурадалда.

Мисалалъе, исана тIобитIараб республикаялъул турниралда тIоцебесеб бакI щвана нижер школалъул шахматазул къебелъухъ куцарав цIалдохъан Адам МухIамадовасе, кIиабилеб призалъулаб бакI щвана ГIайна Мансимовалъе. Бажари бугел лъималазда гьоркьор рехсезе ккола ХIамзат Сайдулаев, Малик Маликов, Баширхан МухIамадов, Улядин Мерданов, КъурбанхIажи Жапаров. Гьел гьабсагIат тIадчIун хIадурлъулел руго 1-10 ноябралда Владикавказалда тIоритIизе ругел ЮФОялъул къецазде ине", — ян абуна гроссмейстер Жакаевас.
"ХIакъикъат" газетаялдаса босараб