Футболалъул рахъалъ Россиялъул чемпионаталъул ичIабилеб туралда Самараялда МахIачхъалаялъул "Анжи" дандчIвана "Крылья Советов" командагун. ХIаялда дагъистаниязул аслияб мухъилъ цере рахъана: Александр Беленов, Сергей Паршивлюк, Седрик Ямбеле, Дарко Лазич, Георгий Тигиев (ГIали ХIажибеков), Джонатан Менса, Шамил ХIасанов, МухIамад Мусалов, Иван Маевский (Бернард Бериша), Иво Иличивич, Филипп Будковский (Янник Боли).

ТIоцебесеб таймалдаго "Анжиялъе" гол кьабуна "Крылья Советов" командаялдаса Моллоца. ХIаялъул рахъалъ гIайиб гIунтIизабизе бакI букIинчIониги, "анжиялъулазухъа" бажарулеб букIинчIо дандиязул голкиперасул тIагIам бахъарал гьужумал гьаризе. Абизе ккола, нилъерал лъикI хIалел, амма голал дандияз кьабулел рукIана. Гьедин ккана 45-абилеб минуталдаги. Самараялъулазул гьужумалъулав Ткачевас цойги нухалъ гол кьабуна Беленовасе.

КIиабилеб таймалъул ахиралда бажарана "анжиялъулазухъа" дандиязул кавабахъе гол кьабун. Гьеб кьабуна Иван Маевскийги хисун майданалде вачIарав Бернард Беришаца. ПалхIасил, хIай лъугIана 2:1 хIисабгун.
Хадусеб туралда МахIачхъалаялъул командаялъ "Анжи-Аренаялда" къабул гьабизе буго Грозныялъул "Терек". ХIай тIобитIизе буго 17 октябралда.

Дагьаб цебе ЦСКАялъул голкипер Игорь Акинфеевасе сакъат ккана ва Россиялъул тIаса бищараб командаялъул тренерал ургъулел рукIана гьесул бакIалда Коста-Рикагун хIалаго каваби цIунизе щив вачиневали. Станислав Черчесовас тIаса вищана "Анжиялъул" голкипер Александр Беленов. Рохалилаб хабар лъарав махIачхъалаялъулазул каваби цIунулес гьадин бицана журналистазе:
"Дун цIакъ разилъана пачалихъалъул тIаса бищараб командаялъул мухъилъе ахIулев вукIин лъараб заманалда. Тренераз диде гьабулеб божилъи ритIухъ гьабизе буго".
Россиялъул тIаса бищараб команда коста-рикаялъулалгун хIазе руго ичIабилеб октябралда, Краснодаралда.
"Х1акъикъат" газетаялдаса босараб