Байрамалъул гIахьалчагIазде саламалъул хитIаб гьабулаго, гьадин абуна РФялъул Северияб Кавказалъул ишазул министр Лев Кузнецовас: "Фестиваль гIуцIизе кколин абураб пикру бижана Ингушетиялда. Анкьго соналдасан гьеб ватIаналде тIадбуссана. Гьеб лъугьана спорталъулгун маданияталъул бечедал гIадатал цолъизарулеб ишлъун". Бразилиялъул Олимпиадаялда СКФОялъул спортсменаз бихьизабураб гьунарги ракIалде щвезабуна гьес ва фестивалалъул кумекалдалъун рукIинесел чемпионал куцаялде хьул бугин бицана. Фестивалалда тIиритIун рукIарал миллиял азбаразеги къимат кьуна федералияв министрас: Северияб Кавказалъул халкъазул гIадат-гIамал гъорлъ бессараб бечедаб "гьумер" бугин гьебин абуна.

Гьудуллъиялъулгун вацлъиялъул пикрабазда буцараб ва цоцада ричIчIизе квербакъулеб ишгун рикIкIана фестиваль, журналисталгун гара-чIварулаго, ГIабдулатIипов Рамазаница. "Гьеб загьирлъана ахирисел рищияздаги: Северияб Кавказалъул халкъал улкаялъул президент Владимир Путинида сверухъ гъункун рукIин бихьизабуна. Гьелъ бихьизабуна нилъер регионазда президентасул къадру букIин", - ан абуна гьес ва фестиваль тIадегIанаб даражаялда гIуцIун букIиналде кIвар буссинабуна.

Байрамалда гIахьаллъана Ингушетиялъул бетIер Евкуров Юнус-Бек, Чачан Республикаялъул бетIер Къадиров Рамзан, Северная Осетия - Аланиялъул бетIер Битаров Вячеслав, Ставрополь краялъул губернатор Владимиров Владимир, РФялъул Северияб Кавказалъул ишазул министрасул тIоцевесев заместитель Байсултанов Одес, РФялъул президентасул СКФОялда вугев вакиласул заместитель Шишкин Андрей. Жинди-жиндир цIарчIварал гъутIби чIана гьез ва киналго цадахъ щвана миллиял азбаразде.

Ингушазул азбаралда бихьизабуна лъимералда цIар лъеялъул гIадат. Гьелда гIахьал гьабураб лъимералда Рамзанилан цIар лъуна - Дагъистаналъул ва Чачаналъул бутIрузул хIурматалда.

"ХIакъикъат" газетаялдаса босараб