Футболалъул рахъалъ Россиялъул чемпионаталъул анкьабилеб туралда МахIачхъалаялъул "Анжи" Екатеринбургалда хIана "Урал" командагун. Гьеб хIаялда анжиялъулазул аслияб къокъаялда гъорлъ гIахьаллъана: Беленов, Паршивлюк, Ямбере, Лазич, Менса, Мусалов, Георгиевский, Маевский, Гасанов, Бериша, Обертан.

"Уралалъул" мухъилъ хIана: Арапов, Динга, Меркулов, Фонтанелло, Кулаков, Фидлер, Емельянов, Павлюченко, Чантурия, Лунгу.

ХIажибеговасегун Тигиевасе сакъатлъи ккун букIиналда бан, "Анжиялъул" тренер Врба Павелица гьезул бакIалда хIазе риччан рукIана дагьал цере "Спартакалдаса" рачIарал Яковлевгун Паршивлюк. Абизе ккола тренерас цере лъурал масъалаби гьез букIине кколеб къагIидаялда тIуразарунин. Чанго гьужумалъулъ гIахьаллъана Яковлев, Паршивлюкицайин абуни анжиялъулазул защита щула гьабуна. ХIаялъул тIоцебесеб таймалъул байбихьи букIана цIакъ хIалуцараб. КIиябго командаялъул ресал рукIана цоцае голал кьабизе, амма голкиперазул махщел гIуна - 25-абилеб минуталдехун анжиялъулазда кIвана дандиязул каваби "рагьизе".

Ахирисел минутазде щвезегIан хIай букIана хIалуцараб, амма командабазда кIвечIо тIокIалъ голал кьабизе. 1:0 хIисабгун Екатеринбургалда Дагъистаналъул командаялъ ракIчIараб бергьенлъи босана.

Гьеб хIаялдаса хадуб турниралъулаб таблицаялда анлъабилеб бакIалде бачIана "Анжи" Хадусеб туралдайин абуни махIачхъалаялъулаз "Анжи-Аренаялда" къабул гьабизе буго турниралъул таблицаялъул лъабабилеб бакIалда бугеб Санкт-Петербургалъул "Зенит" команда.