Океан бахун доб рахъалда тIоритIулел промоушеназда Дагъистаналъул тIоцевесев вакил, ММАялъул бищунго лъикIал Россиялъул рагъухъабазул цояв ХIабиб НурмухIамадов вуго UFCялъул къей гьечIел рагъухъабазул сияхIалъул тIоцебесеб бакIалда. Гьеб сияхI гIуцIана информациялъулаб Sherdog con. сайталъ, хъвалеб буго "ХIакъикъат газетаялда.

Профессионалияб спортивияб карьераялда НурмухIамадов рингалда бергьана 23 рагъулъ ва цониги нухалда къечIо. Дунялалъул рагъухъабазул аслияб промоушен компаниялъулгун гьес къотIи хъвана 2012 соналда ва гьелдаса нахъе бергьенлъаби росана UFCялъул къуватал рагъухъаби Камал Шалорусида, Глейсон Тибауда, Тьяго Таварешида, Абель Трухильода, Пэтом Хорчерида тIад.

ХIабиб НурмухIамадов вуго рейтингалъулаб сияхIалъул тIоцебесеб бакIалда. ГIемерисез гьев рикIкIуна тIадагьаб цIайиялда UFCялда чемпионлъун вахъине рес бугезул цоявлъун. Сакъатлъаби ккун рукIиналъ ХIабиб кIиго соналъ къецазда гIахьаллъичIо. Амма рагъулаб самбоялъул рахъалъ дунялалъул кIицIул чемпионасул ракIчIун буго кватIичIого титулалъулаб рагъда гIахьаллъизе рес щвелин ва чемпионасулаб рачелалъе гIоло къеркьеялда бергьинин.