ЦIиял технологиял хIалтIизарулел лъайкьеялъул идарабазул хIалтIу-хъабазе кумекалъе грантал щваразда гьоркьор руго: ДГУялъул кафедраялъул заведующий МухIамад ТIалхIатов — «ЕГЭялде хIадурлъулеб заманалда ДРялъул учительзабазе, цIалдохъабазе ва гьезул эбел-инсуе психологиябгун педагогияб кумек»; ДГУялъул профессор Анжела Дамадаева — «ДРялда сахлъиялъул рахъалъ гIунгутIаби ругел лъимал ФГОСазул къагIидаялде рачиналъулъ, учительзабазе, цIалдохъабазе ва гьезул эбел-инсуе коррекциялъулаб цIуна-къаялъул рахъалъ психологияб кумек гьаби»; Буйнакск шагьаралъул лъималазул ахалъул заведующая Аминат Керимова — «КIудияб дунялалде гьитIинал галабигун» проекталъухъ; пагьмуял лъималазул республикаялъулаб гIемеррахъазулаб лицей-интернаталъул цIалдохъан АхIмад Халикъов — «ДРялъул лъайкьеялъулъ физикиял алатал хIалтIизари» проекталъе; А. М. ГIабдурахIмановасул цIаралда бугеб Кубачи росдал искусствабазул школа — «Меседил рукъари» абураб халкъияб махщел цебетIезаби» проекталъе.

ГIелму ва техника

ДГТУялъул деканасул заместитель Ханзадай ЗайнулгIабидова — «МахIачхъалаялда ракьбагъариялъул рахъалъул регионалияб модель гIуцIи»; ЦIадаса ХIамзатил цIаралда бугеб ИЯЛИялъул «Расул ХIамзатов. Гьавуралдаса 95 сон тIубаялде — ракIалдещвеязул мажмугI» абураб проект; Тахо-Годил цIаралда бугеб ДНИИПалъул директорасул заместитель Мисиду Шурпаева — «Миллиябгун гIурус мацIазда кIалъалел лъимал ругел школазда байбихьул классазда гIурус мацI малъиялъул къагIида» абураб проекталъе.

Маданият ва искусство

ДРялъул творческиял проектазе квербакъиялъе ДРялъул бетIерасул грантал щвана Дагъистаналъул пачалихъияб ЛъарагI музыкалиябгун драматургияб театралъе, Дагъистаналъул пачалихъияб операялъул ва балеталъул театралъе спектаклал лъезе.
Дагъистаналъул миллияб маданият цебетIезабиялъулъ квербакъи-ялъе: ГI. Тахо-Годил цIаралда бугеб ДРялъул миллияб музеялъе; ПатIимат Шагьназаровалъул «Да-гъистаналъул музыкалияб фольклор лъазабиялъул центр» проекталъе.

ГIолилазул политика

ГIолилазул цIиял къагIидабазул культуриял проектазе квербакъиялъе бергьана Руслан Нукеровасул «Познание» СКФОялъул гIолохъанал гIалимзабазул регионазда гьоркьосеб цIияб къагIидаялъул форум» абураб проект.
Физкультура цебетIе-забиялъулъ «Агитос» проекталъухъ грант щвана ХIасан ГIусмановасе.

ЖамгIияб хIаракатчилъи

ДРялъул халкъалъул социалияб рахъалъ хIаракат цIикIкIинаби ва жамгIияталъул рахъалъ проектал гIумруялде рахъинаруралъухъ: «Сакъатал гIолилал» абураб проекталъухъги щвана грант. Гьединго гьеб щвана «Земфира» СОШалъул «Амина» лъималазул рухIиябгун лъайкьеялъулаб журнал» проекталъе.
ДРялда коммерциялъулал гурел гурхIел-рахIмуялъулал гIуцIабазул социалияб кIваралъул проектал гIумруялде рахъинариялъе: Да-гъистаналъул руччабазул союз — «Гъансито цIунулей» социалиябгун психологияб кумекалъул центр» проекталъе; «Бесдалал гьечIеб Да-гъистан» гIуцIиялъул — «Огонек» проекталъе.

СМИ

Республикаялъулал СМИязул журналистазул миллиял мацIазда творческиял проектазе квербакъиялъе: «Калам» издательствоялъулгун лъайкьеялъул центр — «ГIагараб гъанситодул хинлъи» передачабазул цикл» проекталъе. Гьелъие нухмалъи гьабизе буго «ХIакъикъат» газеталъул бетIерав редакторасул заместитель Шамсият Султанбеговалъ.
ЦIияб къагIидаялъул тематикаялда творческиял проектазе кверба-къиялъе: ПатIимат МухIамадовалъул — «СМИязда цIиял къагIидаби хIалтIизари» проекталъухъ. «Да-гъистан» РИАялъул директор МухIамад МухIамадовасул — «360 форматалда рекъон цIиял харбазул контент гIуцIи» проекталъухъ.
«Каспий медиа» регионалияб журналистика цебетIезабиялъул центр» — «Нилъер рагIуе кинаб жаваб щвелеб?» абураб проекталъухъ.

Предпринимательлъи

Сахлъиялъул рахъалъ гIунгутIаби ругел ва цогидалги социалияб рахъалъ загIипго цIунарал (бесдалал, пенсионерал, сакъатал гIадамал ва цогидалги) гIадамал хIалтIудалъун хьезариялъе гIуцIарал предпринимательлъиялъул проектазе квербакъиялъе: Наида МухIамадовалъул — «Silvermaster» проекталъухъ; Хадижат Сулеймановалъул — «Бокьараб махщел кодоб бугев» проекталъухъ.

ПатIимат СултIанмухIамадова