27 августалда тIобитIана Дагъистаналъул миллияб политикаялъул, информациялъул ва къватIисел бухьеназул министрлъун хIалтIулев вукIарав МухIамадсалихI Гусаев ракIалдещвезавиялъул митинг. Гьелда гIахьаллъана республикаялъул ва ведомствабазул, жамгIиял ва гIелмиял гIуцIабазул вакилзаби, ДРялъул Миннаца­лъул хIалтIухъаби. Митинг рагьана ДРялъул миллиял ишазул ра­хъалъ министрасул ишал тIуралей Татьяна Гамалейица. Гьелъ бицана МухIамадсалихI Гусаевасул гIумруялъул ва ишазул хIакъалъулъ.

Гьединго гьесул хIакъалъулъ бицана РАНалъул ДНЦялъул этнополитикиял цIех-рехазул регионалияб централъул директор Низами Казиевас, ДРялъул бетIерасул гIакълучи Иляс Мамаевас, профессор, ЖамгIияб палатаялъул член Мустафа Билаловас, ДГУялъул электронниял СМИязул кафедраялъул нухмалъулев Ильман Алипулатовас ва цогидазги. Балъгояв тушманасул квердаса хварав, 2003 соналъул 27 августалда чIварав МухIамадсалихI Гусаев цоги нухалда ракIалдещвезавуна руцIцIунчIеялъул минуталдалъун.

МухIамадсалихI Гусаевасул цIар кьун буго МахIачхъалаялъул газетазулгун журналазул комплексалъе, тахшагьаралъул ва Дербент районалъул Чинар росабазул къватIазе, Чинар ва Агул районалъул Бушаг росабазул школазе, Ставрополь краялда бугеб Дагъистаналъул халкъазул культурияб централъе.