Дагъистаналъул халкъияв поэт Расул ХIамзатов гьавуна 1923 соналъул 8 сентябралда Хунзахъ районалъул ЦIада росулъ, машгьурав шагIир ХIамзатил хъизамалда. Эбелалда цIар букIана Хъандулай. Гьел кIиялго рукIана цIакъ гIадамал хириял, махсара хочI бокьулел, ракIбацIцIадал магIарулал. Эбел-инсул хасият-гIамал васасул чорхолъги, бидулъги, рекIелъги бессичIого хутIичIо.

ТIабигIаталъги тIадегIанав бетIергьанасги Расулие кьуна къанагIатаб ва хIикматаб гьунар, бергьараб кIалзул пасихIлъи, рекIел цIодорлъи; живго гьитIинаб мехалъ ва гIолохъанлъуда дагьав хехдарулев, цIакъго ракI гIанчIав, гIорхъолъа ун гIадамазда божулев чи вукIаниги, Расулил вахъана кIудияв шагIир, гьесул асараз рохел щвезабуна, магIарулазе гуребги, дунялалъулго миллионал гIадамазе.

Жиндирго гIумруялъул аслияб мурад Расулица баян гьабуна кочIол ункъо мухъалдалъун:
Рорхатал цIвабзазде сухъмахъал гьарун,
Гьенире ракетал роржаян абе.
Бищун тIадегIанал, гIагарал цIваби-
ГIадамазухъе щвей буго дир мурад.

Гьел мухъаз жанибе бачуна кIиго аслияб магIна: тIоцебе босани, гIадамазул хасият, гьесул рекIел балъголъаби, анищал, хьулал рагьизе, лъазе бугеб хIасрат, кIиабизе абуни — инсан хIайран гьабиледухъ хъвадаризе бугеб анищ. ТIурана гьел мурадал. Расулие гIадамалги, гIадамазе Расулги цоцазе цIакъ хириял лъугьана. ШагIирасул кучIдул рекIее бокьухъе гIужда щвана, гьез хъулухъ гьабуна тIолабго цебе тIураб инсанияталъе, бецIлъиялде данде рагъ бан, гьайбатлъи ва канлъи кIодо гьабун.

Расул ХIамзатовасул творчество цIакъ бечедаб буго. Поэтасул аслиял темабазул цояблъун ккола халкъазул вацлъи ва гьудуллъи, сахлъи, рекъел. «Сахал чагIи сах таги, квешал чагIи квеш таги, киналго магIарулаз гьедин гьарулеб буго», — гьеле шагIирасул гьари.

Гьал къояз тIобитIулел руго Расул ХIамзатовасул гьавураб къо к1одо гьабун батIи — бат1иял мероприятиял, гьелда хурхун нижер редакциялъги хIадур гьабуна гьаб гьитIинабго видеоролик.