Артем Здуновасул хIаракаталдалъун тIобитIана РФялъул Северияб Кавказалъул ишазул рахъалъ министерствоялда цебе гIуцIараб хIалтIул къокъаялъул данделъи. Бицана регионалда инвестициязул проектазе санагIатал шартIал гIуцIиялъул хIакъалъулъ, — ян хъвалеб буго "ХIакъикъат" казияталда.

Данделъиялда гIахьаллъана РФялъул Северияб Кавказалъул ишазул министрасул заместитель Ольга Рухуллаеваги, «Стратегиял пикрабазул цIиял проектал церетIезариялъул агентство» АНОялъул генералияв директорасул гIакълучи Анвар ХIажиевги, гьебго агентствоялъул «Регионазул цебетIей» абураб мухъалъул директор Игорь Кустаринги, ДРялъул хIукуматалъул председателасул тIоцевесев заместитель Рамазан ГIалиевги цогидалги.

Данделъи нухда бачана Ольга Рухуллаевалъ. Гьелъ бицана гьабсагIаталда аслияб масъалалъун кколин социалияб рахъ, ай промышленносталъул цебетIеялъе квербакъун бажарулел хIалтIухъаби хIадури. Гьеб рахъалъ лъикIаб хIалбихьилъун гьелъ рехсана Worldskills абураб гIолохъанал махщелчагIазул къецал тIоритIиги, гIемерал соназ хIалтIулел махщелчагIаз гIолохъабазе малъа-хъвай гьабиги, социалиябгун экономикияб цебетIеялъе квербакъулел хIалбихьиял субъектазда гьоркьор тIиритIизариги.
Анвар ХIажиевас абуна, хьул бугин регионазда данделъи тIобитIиялъулги лъикIаб хIасил ккеялде.

Игорь Кустариница абуна щибаб регионалъе аслияблъун кколин кадрабаздалъун хьезариялъул масъала. Бажари бугел, махщел тIокIал хIалтIухъаби ругеб бакIалда инвестициязеги цIикIкIарал ресал щолин абуна гьес.

«ГIолохъанал махщелчагIи» абураб Регионалияб цебетIеялъул союзалъул управлениялъул нухмалъулев Максим Дмитриевас бицана Worldskills абураб чемпионаталъул регионалиял къецазда ккарал хIасилазул хIакъалъулъ.