"Рагьараб нухмалъи" абураб проекталда рекъон, ункъабилеб марталда шагьаралъул гражданал къабул гьаруна Муса Мусаевасги, гьесул заместителазги ва отделазул нухмалъулезги.

Сверухълъи берцин гьаби, чIунтизе таралъуб ахал гIезари, изну гьечIел бакIал разе гьукъи, нухазда хIинкъи гьечIолъи цIуни, кьишниялдаса бацIцIалъи гьаби — гьел ва цогидал масъалаби тIатинаруна мэриялде рачIарал гIадамазул хитIабаз, хъвалеб буго "Х1акъикъат" казияталда.

"Яндекс.Транспорт" абураб система тахшагьаралда чIезабеян ва гьелдалъун инвестициязе нухал рагьулин пикру загьир гьабуна Аскандар МухIамадовас, Тимур Саркаровас ва Тимур Мажидовас. "Яндекс.Транспорт" — гьеб ккола Россиялъул "Яндекс" компаниялъул хъулухъ. Гьелда рекъон лъазе кIола жамгIияб транспорт киб бугебали. Гьелде рачIуна ГЛОНАСС/GPS системаялдаса баяналги. "Яндексалъулгун" цебеккунисеб къотIиги гьабун бугин абуна Аскандар МухIамадовас. Муса Мусаевас гьеб иш мухIканго лъазабеян тIадкъана мэриялъул правоялъул управлениялъул нухмалъулев Сулейман Мурадовасда.
Изну гьечIого ракьги жиндиего босун, азбаралда мина баялъул хIакъалъулъ бицана "Радиотовары" микрорайоналъул гIадамаз. Гьединабго хIал буго ГIахъущиясул проспекталда бугеб №92 минаялда аскIобги. КIиябго бакIалде администрациялъул вакилзаби ритIана мэрас.

№42 школалда аскIоб гьитIинабго бакI буго. Кьишниялдаса бацIцIадги гьабун, гьениб гъутIбиги чIун, хIухьбахъизе санагIатаб бакI гьабеян гьаригун ячIана цо чIужугIадан. Гьединабго гьаригун хитIаб гьабуна ХIажи ГIалибеговасул къотIнор гIумру гьабун ругезги "Семендер" жамгIияб гIуцIиялъул нухмалъулезги. Лъабабго адресалде щвезе рагIи кьуна Муса Мусаевас. Гьел бакIазда гьитIиналго ахал гьариялъул проектал хIадуреян тIадкъана гьес тахшагьаралъул бетIерав архитектор МухIамадрасул ГьитIиновасда.

Учхозная ва ГIахъущиясул къватIал цолъулеб бакIалда гIадамазул гIумруялъе хIинкъи бугин абуна Муртуз Мирзаевас. Гьелъие гIиллалъунги рехсана машинаби сверизаризе бакI гьечIолъи. Мэрасул заместитель Абусупян ХIасановас жаваб кьуна гьеб бакI хисизабизе схема хIадурун бугин ва, гьенир инженериял сетал рукIиналъ, масъала тIубаялъул иш хадуб бехъерхъизабулеб бугин.
Кьишниялдаса шагьар бацIцIад гьабиялда бан, жиндирго пикраби гIахьал гьаруна МухIамад Амировас. Гьевги кьишниялъул жавабчилъи тIадаб компаниялъул нухмалъулевги рачун, итни къоялъ жиндихъе рачIаян тIадкъана Муса Мусаевас Камил Изиевасда.