Гьелда гIахьаллъана ДРялъул бетIер Рамазан ГIабдулатIиповги. Данделъи нухда бачана РФялъул хIукуматалъул председатель Дмитрий Медведевас. "Форумалда рес букIуна цIиял партнерал ралагьизе, къотIи-къаял гьаризе, нужерго компаниязул экономикиял ресазул баян кьолел презентациял рихьизаризе. Ахирал соназда къватIисел улкабаз Россиялде данде гьарурал экономикиял квекIеназе мустахIикъаб жаваб кьуна нилъер регионаз. Январь моцIалъул хIасилаздасан баянлъулеб буго, цебесеб соналде дандеккун, микьго проценталъ гражданазул хайир цIикIкIараблъи, ай улкаялда экономикияб цебетIей букIин. Хадубккунги гьеб хIасилалдаса гIодорегIан ккеларедухъ хIалтIизе ккола нилъ", — ан абуна Дмитрий Медведевас.

28 февралалда Сочиялда букIана "Каспиялъул транспорталъулабгун логистияб комплекс: дармилгун экономикияб рес ва инвестициязулал гьоркьорлъаби" абураб темаялда тIасан данделъи. Гьелдаги гIахьаллъана Дагъистаналъул бетIер, хъвалеб буго "ХIакъикъат" казияталда.

ГьабсагIаталда республикаялда бугеб цебетIеялдаса жив рази вугинги абун, РФялъул миллиял ишазул агентствоялъул нухмалъулев Игорь Бариновас бицана Каспиялъул кластер цебетIезабиялъул бицунеб Дагъистаналъул проекталъул рахъкколин. "Республикаялда чIара-хьараб хIал буго жакъа, цо-цо масъалаби тIуразарун рахъунги руго, амма гьеб сасараб ахIвал-хIалалъе ахир лъезе къваригIарал къокъабиги камуларо. Гьединлъидал регион щулалъизабиялъе гьабулеб хIалтIи чIезе тезе бегьуларо. КIочене бегьуларо, экстремизмгун гьабулеб къеркьеялъулъги СКФО цебесеб кьерда букIин. Нилъеца, цадахъ рахъун, Кавказ гьабизе ккола ракълилаблъун, цебетIолеблъун ва инвесторазда берцин бихьулеб регионлъун", — ан абуна Игорь Бариновас.

Географиялъул рахъалъ, дармие ругел ресазухъ ва къватIисел улкабазулгун бухьеназе санагIатал шартIазухъ балагьун, Дагъистаналъе Каспиялдаса хайирго щолеб гьечIолъиялъул бицана данделъиялда Рамазан ГIабдулатIиповас. "Республикаялъул ва федералияб бюджетазе Каспиялдаса щола мукъсанаб хайир. Каспиялда сверухъ гIумру гьабула 500 млн чияс. Санайил гьениб хIалтIизабула гIага-шагарго анлъго трлн доллар. Каспиялъул ресаздаса букIине кколеб къадаралда пайда босуларо нилъеца.

Нижеца хIадурана халкъазда гьоркьосеб индустриалиябгун логистияб комплексалъул проект. Гьеб гIумруялде бахъинабизе буго МахIачхъалаялда. Проекталда гьоркьоре уна транспорталъулабгун логистияб, лангарал гьариялъул предприятиязул, машиностроительнияб, биотехнологиязулаб, рагъулаб, ччугIил промышленносталъулаб ва туризмалъулаб кластерал.

Гьеб проект гIумруялде бахъинабизе хIадур буго Дагъистан. Масала, транспорталъулабгун логистияб ва ралъдал индустриалияб комплексалъул багьа буго 127 млрд гъуруш. Нижеда ракIалда буго, гIицIго 27 млрд гъуруш бюджеталдасаги босун, хутIараб 100 млрд инвесторазухъа балагьизе. ХIажат буго проекталъул щибаб гали мухIкан гьабизе ва дагь-дагьккун гьеб гIумруялде бахъинабизе. Гьелдалъун рес щвела гIемерал масъалаби тIуразаризе", — ян бицана Рамазан ГIабдулатIиповас.

СКФОялъул тIолалго субъектазе Каспиялъул кIудияб кIвар букIинги ракIалдещвезабун, Ингушетиялъул бетIер Юнус-Бек Евкуровас абуна гьеб проекталъул киназего хайир щвезе бугин. "Чияразул бакIалда нилъерго къайи хIалтIизабулеб заманалда щибаб субъекталъул букIина бича-хисизе къайи, хасго гьеб къватIисел улкабазде баччизе",- ян пикру загьир гьабуна гьес.

Экономикиябгун социалияб рахъалъ улка цебетIезабулеб проекталъул рахъкквезе бугин абуна РФялъул Северияб Кавказалъул ишазул министр Лев Кузнецовасги.