Пачалихъалъул Кремлялъул кIалгIаялда тIобитIана 26 февралялъ концерт «Терроралде данде музыка»- ян абураб, Россиялъул бахIарчи Андрей Карлов ракIалде щвезавизелъун.

Гьеб концерталда гIахьалъи гьабуна этно-джазовый коллектив «Мирросалъ», цIар рагIараб къукъа SEVEN/EIGHT BANDалъ, РФ ялъул артистка Нина Шацкаялъ ва Екатерина Гусевалъ, пианистка Екатерина Мечетиница, кочIохъан Сосо Павлиашвилица, Алиса Игнатьевалъ, Олег Моториница ва гьел гурел цойги цIар рагIарал артистаз.

Гьеб концерталде хас гьаюн ахIун ячIун йикIана Дагъистаналъул халкъияй артистка Лариса ХIажиеваги, гьеб концерталда гьелъ ахIана ВатIаналде бугеб рокьиялъул хIакъалъулъ кечI.  Нижер «РДВялъул» корреспонденталда гьелъ абуна концерт цIакъ лъикI гIуцIцIун букIанин, лъикIал артисталги рукIанин. «Артистка хIисабалда дие аслияб жо буго цIураб зал бихьизе. Дун йохарай йиго 5000 чиясда гьоркьоса I200 чи балагьизе рачIарал дагъистаниял рукIиналдаса.  Дихъ гIенеккизелъун гьенире рачIун рукIана гьудулзабиги, дир лъалел хъвалелги. Дир ракI бохун букIана гьезие киназего дица ахIараб кечI бокьиялдаса.

Кремлялде кечI ахIизе киналго ахIуларо. Дие бокьула гьезул зал, гьениб лъикIаб макъан лъугьуна!— ян абуна гьелъ.

0