"Дагъистан" абураб гама ккола "Калибр-НК" универсалиял ракетабаздалъун хьезабураб ва, тушманасда жиб бихьунгутIиялъул мурадалда, къанагIатал технологиял хIалтIизарулеб, мухIканал ракетазул комплексги тIад бугеб Россиялъул ВМФалъул (рагъулаб ралъдал флоталъул) тIоцебесеб гама. Гьелъул кумекалдалъун лъеда тIад, лъеда гъоркьан ва гьаваялдасан рагъулал масъалаби тIуразаризе бегьула. Гьелда хъулухъ гьабулел аскарияз цIунула пачалихъияб гIорхъи, ралъдал экономикияб зона ва гьарула цогидал ишалги.

21 февралалда гьеб гамаялъул рагъухъабазда ВатIан цIунулезул къо баркана Рамазан ГIабдулатIиповас. Гьевгун дандчIваялъе кьерда эхетун рукIана киналго аскариял ва, Россиялъул гимн ахIун бахъарабго, лъабцIул «гьурраги» ахIун, республикаялъул бетIерасе салам кьуна гьез.

Рагъухъабазде хитIабги гьабун, Рамазан ГIабдулатIиповас ракIалдещвезабуна Россиялъул бетIерав командующий Владимир Путинил ва РФялъул оборонаялъул министр Сергей Шойгул нухмалъиялда гъоркь ахирал соназда улкаялъул къадру тIадегIанаб даражаялде бахинабиялъул ва Сириялъул халкъалъе нилъер аскарияз гьабураб кумекалъул хIакъалъулъ. "ЦIигьабуна армиялъулгун флоталъул техника, ярагъ, гьелдалъун хисана аскариязде бербалагьи. Жакъасеб армия къеркьолеб буго халкъазда гьоркьосеб терроризмалде данде. Террористазе данде Сириялда унеб рагъулъ гIахьаллъана Каспиялъул флотилиялъул "Дагъистан" гамил экипажги.

Баркула нужеда ВатIан цIунулезул къо! Гьарула рагъулаб хIадурлъиялъулъ икъбалги роцIараб зобги", — ан абуна гьес.
ЛъикI хъулухъ гьабулел рагъухъабазе гьес кьуна ДРялъул хIурматалъул кагътал ва республикаялъул бетIерасул цIар тIадхъварал сагIтал.

Жидер хIурмат-адаб гьабуралъухъ ДРялъул бетIерасе баркала кьуна 106-абилеб бригадаялъул командаялъе.

"ХIакъикъат" казияталдаса босараб