Gelegen soñugünde Maskevde Qumuq geçesi bolajaq. Qumuq madaniyat geçesin, bir neçe yıl alda taxşaharnı madaniyat yaşavuna girip, bugün de qastqılıp işleygen Maskev qumuq qurum QUMUQLAR ötgere. Onu başçısı Arslan Xasanlı, bu ahvalatnı aslu teması Qumuq bayraq günü bolajağın bildirdi.

- Sizin qurum bu yılnı Qumuq madaniyat geçesi deygen çaradan başlama haqıllana. Aldağı yıllarda bolğan yimik quruşda bu çara da bolajaqmı?

— Qumuq geçesi aldan berli bizin qurum gelegen yılğa qurğan proektleni va çaralanı haqında belgili etegen çara bolup toqtaşdırılğan, amma bu yıl biraz başğa formatda bolajaq. Bu gezik ahvalat, üç yıl alda 9-çu Çille ayda xalqğa tanıtılğan, Qumuq bayraqnı gününe baylavlu. Amma 21-çi Çillede bolağan Xalqara ana til gününe de ahamiyat berejekbiz.

- Adamlağa ne görsetejeksiz, programmağızda ne nömürler bar?

— Programma bir neçe bölümge bölüñen. Birinçi bölüm Qumuq bayraq gününe bağışlanğan. Qumuq simbolluqnu haqında çığışlar bolajaq va, tış ülkelerdegi qumuqlar aytğanlay, Baby-blue-bayrağıbıznı haqında da çığış bolajaq. Ekinçi bölüm Ana tili gününe bağışlavlu — bu bölümde qumuq yazıv va qumuq tilni saqlamaq va ösdürmek uçun proektler bulan tanış etejekbiz. Eki de bölümde siʼrular oxulanajaq, amma birlerin adamlar birinçiley eşitejekler.
Ondan qayrı «PALPAN FILM» deygen prodüsörlük markazından tarix filmni haqında çığış bolajaq, Yırçı Qazaqnı — iñ görmekli şairni va qumuq adabiyatnı atasın haqında. Bu proektni ayrılığı — film Yırçını yañız sair ustalığın haqında bolmay, onu adamlığın va türlü-türlü yaxşı xasiyatların açıq görsetejek, bizin cahillege ülgü bolsun dep.

- Bayraq sizge nedir? Xalqğa bir bayraq bolma nege tarıq, ne aslusu bar?

Bayraq bizin qavum kimligibizni belgisi. Aldan berli Qumuq tüz bölünüp, qumuqlar bir neçe bölgelerde yaşap qalğan, amma bir simbolluq, administrativ va çığrapiya dazular bulan bölüñen xalqnı birleşdiregen faktor bola. Bizin bayraq yañız Rus paçalıqda ötgerilegen çaralarda bolup qalmay, tış ülkelerde xalqara forumlarda va konferenslerde de qumuqlanı belgiley.

- Siz ayırıp aytdığız geçege yañız qumuqlar bolmay kim busa da gelip bolağannı.

— Qumuq geçesini muradların birisi — başğa milletleni va özge madaniyatlı adamlanı qumuq madaniyat bulan tanış etmekdir. Bizin ahvalatlarda har zamanda da türlü-türlü milletler geleler, yañız qumuqlar bolmay, ondan qayrı, yañız gelegenleni arasında tügül, ortaqçılanı arasında da başğa millet adamlar bolalar.
Qumuq madaniyat çara — Qumuq geçesi — Maskevni camiyat şahar aralıq SQ Resurs markaznı üyünde ötgerilejek («Räzanskiy prospekt» metro istansiyada, 4-çü Veşnäkovskiy proezd, 1 üy, 1 korpus). 15:00 başlana. Tegin giriv.