Москваялда вукIаго, ДРялъул бетIер дандчIвана "Телевизионное творческое объединение "АМиК" ОООялъул ва КВНалъул халкъазда гьоркьосеб союзалъул президентгун.

ДандчIвай букIана "Планета КВН" абураб Москваялъул гIолилазул централда. Рамазан ГIабдулатIиповас Александр Масляковасе кьуна "Дагъистан Республикаялъе гIоло гьабураб хъулухъалъухъ" абураб орден. "Дагъистаналъе захIматал соназда, ай республикаялъул хIакъалъулъ квешаб пикру тIибитIизабулеб заманалда, нилъер гIолилазул чIаголъиялъул ва лъикIаб гIамал-хасияталъул бицунеб бакIлъун букIана гIицIго КВН. Нужеца, махсараялдалъун букIаниги, республикаялъул берцинаб сипат бихьизабизе хIаракат бахъана", — ян абуна ДРялъул бетIерас.

ГIемерал соназ хисичIого, машгьураб телепрограмма бачунев Александр Масляковас гьадин абуна: "Северияб Кавказалъул республикабазда гьоркьоб тIоцебе Дагъистаналъул гIолилаз байбихьана нижер хIаязулъ гIахьаллъизе. РакIбохизабулаан республикаялъе гвангъараб нурлъун КВН кколин абураб пикруялъго. Хьул буго, республикаялда КВН жеги цебетIезе букIиналде ва Светлогорскиялда тIобитIизе бугеб "Голосящий КиВиН" конкурсалде лъикIаб хIадурлъигун Дагъистаналдаса къокъаги бачIиналде. Кавказалда, хасго Дагъистаналда, пагьмуял гIолилазул къебелъи бугин рикIкIуна дица".