Москваялда, банкетный залалда, Зайнаб Махаевалъул «МагIарулалъул ракI чучи 2» ян абураб концерт тIобитIана.
Тахшагьаралда гьелъул концерталъухъ балагьизе рачIана гIемерал дагъистаниял ва цоги республикабазул гIадамал. Берцин ретIа — къарал гIемерал руччабиги, ва бихьиналги киналго урхъун ругоан жидеего йокьулей артисталъухъ. Гьеб сордоялъ Зайнабил кочIода гъоркь кьурдизе вахъунарев чиго хутIун вукIун ватиларо. Гьеб сордоялъ дагъистаналъул цIар рагIарай артисткаялъ ахIана цIиял ва цере ахIулел рукIарал, киназего рокьулел кучIдул.
Зайнаб Махаевалъ кечI ахIизе байбихьана гьитIинаб къоялдасаго, жеги лъабабилеб классалда цIалулей йикIадго. Доб заманалъ, ЧIарада мухъалъул ЦIуриб росулъ гьабураб кочIол къецалда, гьелъие щун букIана тIоцебесеб бакI.

Жакъа къоялъин абуни гьей йиго цохIо Дагъистаналъул гурей, цойги республикабазулги бищун цIар рагIарай кочIохъан.

Зайнабица рикIкIуна кочIохъан рази гьабулеб жо бугила, жиндир концерталде гIемерал чи рачIин, ва гьез лъикI къабул гьайи.

Гьеб сордоялъ кочIохъаналъ ахIана рокьул ва кьалул цIар рагIарал Залпа МухIамадрасуловалъул, Залму Батыровалъул ва цоги авторазул кучIдул.

Гьелдаго цадахъ, сордо берцин гьабизе гьенире рачIана цойги кочIохъабиги: Кристина, Эльбика Джамалудинова, Аминат Мусаева, Вика Джамалудинова, Муминат МухIамадова, МухIамад Аликперов ва Алипат Мусаева.

Гьеб концерт гьабизе кIвар кьурав продюсерас Шамиль Багиловас, бицана жидеца Зайнаб Махаева ахIанила Москваялде гIемерал гIадамазул гьариялда рекъон. «Къаси тIобитIараб концерталде рачIана жидерго гьабулебги тун, гьелъул кечI бокьулел. ГIемерисел гьанире рачIуна гьудул гьалмагъзабигун дандчIвазелъунги. Щибаб нухалъ концерт гьабилелда цебе нижеца гьабула гьанире рачIунезда гьоркьоб цIех — рех, гьелъул хIасилалда бараб букIуна хадусеб нухалъ лъил концерт букIине бугебали» — абуна ART-Narciss алъул гендиректорас.

Балагье гьеб концерталда рахъарал суратазухъ>>