Январалъул ахиралда Астанаялда данделъана Казахстаналъул, Россиялъул, Ираналъул, Сириялъул хIукуматазул, ООНалъул, СШАялъул ва Турциялъул вакилзаби. Гьел дандчIвана Сириялъул рагъулаб оппозициялъул вакилзабигун ва бицана ракълилаб гIумруялде тIадруссиналъе шартIал гIуцIиялъул.
Гара-чIвариял халалъана кIиго къоялъ. Сириялъул рагъулаб оппозициялъул цогояб вакиллъиялъ ва Дамаскалъул официалиял вакилзабаз, Россиялъул, Турциялъул ва Ираналъул гьоркьохъанлъиялдалъун гьаруна лъикIал хIасилазде рачIинаризе бегьулел гара-чIвариял.

Экспертазул пикруялда рекъон, гара-чIвариялъул лъикIаб хIасиллъун рикIкIине бегьула:
1. Сириялъул хIукуматалъул ва оппозициялъул, ай дандечIараб кIиго къуваталъул вакилзаби тIоцебесеб нухалда дандчIвай, цадахъ гIодорчIей ва цоцазул пикрабазухъ гIенекки.
2. Россия, Турция ва Иран кьвагьи гьоркьоб къотIинабиялъул низамалда хадуб халкквезе разилъи. РФялъул президентасул хасав вакил Александр Лаврентьевас абуна, гьелъул мурадалда цадахъаб къокъа гIуцIизе бугин, ва гьеб къокъа хадусеб моцIалдаго Астанаялда хIалтIизе бугин. Нагагь хIажалъани, Сириялъул хIукуматалъул ва рагъулаб оппозициялъул вакилзабиги комиссиялъул хIалтIулъ гIахьаллъизе ругин бицана гьес.
3. Жал хIадурго ругин Сириялъул цIияб Конституциялда тIад цадахъ хIалтIизеян лъазабуна оппозициялъ.
4. Оппозициялъул къокъаби террористазул къокъабаздаса ратIагьаризеги хIаракат гьабуна дандчIваялда. ГьабсагIаталда мухIкан гьарун руго "Исламияб пачалихъ" абураб террористияб гIуцIи бугел бакIал ва байбихьун буго "Жабгьат ан-Нусраялъул" террористал ругел бакIалги лъазаризе.

5. Рагъулаб оппозициялъ абуна ООНалъул нухмалъиялда гъоркь микьабилеб февралалда Женеваялда тIобитIизе бугеб данделъиялда гIахьаллъизе бокьун бугин. Гьеб пикруялъул рахъккуна Москваялъ, Тегераналъ ва Анкараялъ.

6. Россия жидер тушман гуреблъиялда ва гьелъ жидер рахъалъ хIиллаби ургъизе гьечIеблъиялда божана Сириялъул рагъулаб оппозиция. Гьединаб пикру загьир гьабуна "Жейш ал-Ислам" къокъаялдаса оппозициялъул вакилзабазул нухмалъулев МухIаммад Аллушица.

«Цоцазде дандечIарал Сириялъул къуватазул вакилзаби цадахъ гIодорги чIезарун, гьезда гьоркьоб божилъиялъулаб гара-чIвари гьаби букIана Астанаялда тIоритIарал дандчIваязул аслияб мурад. Амма гьеб мурад тIубазе Сириялъул кIиябго рахъалъул вакилзаби жеги хIадур гьечIин абуна Александр Лаврентьевас. Гьелдаго цадахъ гьел цо отелалда рещтIин, цо столалда нахъа цадахъ гIодорчIей ва батIиял улкабазул вакилзабигун цадахъниги цоцазулгун гара-чIвариял гьари — гьебги гьабсагIаталда кIудияб ишлъун ккола. Ракълилаб гIумруялде тIамураб тIоцебесеб галилъун рикIкIине бегьула гьеб", — ан абуна гьес.