Грозный шагьаралъул 198 сон тIубай ва Россиялъул БахIарчи Къадиров Рамзан республикаялъул бетIерлъун вищи кIодо гьабуна нилъер мадугьалзабаз. Гьеб тадбиралда гIахьаллъана Дагъистаналъул вакилзабиги, хъвалеб буго "ХIакъикъат" газетаялда.

Чачаназул парламенталда цеве кIалъалаго, ЧРялъул бетIер Къадиров Рамзаница гьадин абуна: "Чачан халкъалъе пайдаявлъун вукIине щвеялдаса чIухIарав вуго дун. Халкъалъул божилъиялдаса цIикIкIараб сайгъат щибниги гьечIо — гьелъ кьола къуват, цIиял ишазде байбихьизе хIалгун жан, нилъер гIумру лъикIлъизабизе гъира. Гьеб хъулухъалда вукIине кандидатура лъезе ихтияр кьуралъухъ баркала буго президент Владимир Путиниеги. Дир аслияб мурад буго социалиябгун экономикияб рахъалъ республика цебетIезаби ва гражданазул гIумруялъе хIинкъи гьечIолъи букIинаби. Аслияб кIвар кьезе буго гIолилазулъ ватIан бокьи куцаялде. Гьелъие жигар бахъулел ва махщелгун бажари бугел гIадамаздаса гIуцIараб къокъаги буго нилъер", — ан.

РФялъул президентасул СКФОялда вугев вакил Олег Белавенцовас ва РФялъул хIукуматалъул председателасул заместитель Александр Хлопониница чачаназул бетIерасда хъулухъ баркана. ДРялъул бетIер ГIабдулатIипов Рамазаница гьадинаб хитIаб гьабуна Къадиров Рамзаниде: "Инсанасул гIумруялда батIи-батIиял лъугьа-бахъинал рукIуна. Дуца ва дур инсуца бахIарчиго хIехьана гIумруялда дандчIварал захIмалъаби. Жакъасеб Чачаналъухъ балагьани, сундуе гIоло гьеб гьабурабали бичIчIизе бигьалъула. Дида ракIалда буго 1996 соналъул Грозный, Россиялъул халкъазул ассамблеялъул данделъи тIобитIулеб заман. ЧIвадназде сверун букIана шагьар. Гьединабго ахIвал-хIалалда букIана тIолабго республикаги. Амма ЧРялъул тIоцевесев президент Къадиров АхIмад-хIажил ва дур хIаракаталдалъун республика цIилъана ва Грозный лъугьана Россиялъул бищунго берцинал шагьаразул цояблъун. Гьеб хIалтIул цIикIкIарасеб бутIа бегана жеги гIолохъанав, амма жигар-жан бугев чиясул гъажалде. Дуца, Рамзан, инсул мустахIикъав ирсилав вукIин бихьизабуна. ХIалчIахъаги дур!".