Форумалда гIахьаллъи гьабуна Россиялъул киналго регионаздаса ва къватIисел улкабаздаса 900-гIанасев журналистас. Дагъистаналдаса гьенибе араб вакиллъиялда гьоркьор рукIана печаталъул ва информациялъул министр Бурлият Токболатова, Дагъистаналъул Журналистазул союзалъул председатель ГIали Камалов, республикаялъул бетIерасул гIакълучи Денга Халидов, батIи-батIиял СМИязул редакторзаби ва журналистал, хъвалеб буго "ХIакъикъат" газетаялда.

Форумалда кIалъана ва журналисталгун дандчIвана политикал, гIалимзаби, культураялъул хIаракатчагIи. Рохалилаб къагIидаялъ тадбир рагьулаго Россиялъул президент Владимир Путинил рахъалдасан саламалъулаб кагъат цIалана РФялъул Журналистазул союзалъул председатель Всеволод Богдановас.

"20 соналда жаниб форумалъ данде гьаруна цого пикру бугел нилъер улкаялъул ва къватIисел пачалихъазул СМИял. Фестивалалъул гIахьалчагIаз цоцазулгун щула гьарула профессионалиял ва гьудуллъиялъулал бухьенал. ЛъикIаб гIадатлъун лъугьун буго фестивалалда машгьурал политиказ, гIалимзабаз, искусствоялъул ва гIелмуялъул хIаракатчагIаз гIахьаллъи гьабулеб букIин. Гьединал дандчIваяз квербакъи гьабула цоцазулгун хIалбихьи гIахьал гьабизе, СМИязул хIалтIухъабазе хIинкъи гьечIолъи букIинабизе, чIварал ишцоял хъизамазул рахъкквезе. Гьайгьай, форумалъ рес кьола кинабго рахъалдасан кIвар бугел суалал ва масъалаби тIуразаризе. Журналистазул захIматалъ, гьезул жавабияб рукIа-рахъиналъ кIудияб бакI ккола халкъазда ва улкабазда гьоркьор къотIи-къаял щула гьариялъулъ, терроризмалда ва коррупциялда данде къеркьеялъулъ, миллиял ва диниял рикьалаби тIагIинариялъулъ. РакIчIарав вуго, гьадинал фестивалаз жамагIаталда гьоркьоб журналистасул къадру борхизе, профессионалияб даража цIикIкIине букIиналда", — ян хъван буго кагътида.
Фестивалалъул хIалтIулаб программа байбихьана "Международная формула доверия Восток-запад" абураб данделъиялдасан. Гьениб гIахьаллъи гьабуна Россиялъул гурелги, къватIисел пачалихъаздаса журналистазги. Гьезда гьоркьор рукIана Халкъазда гьоркьосеб журналистазул федерациялъул (МФЖ) генералияв секретарь Антони Беланже, гьебго федерациялъул вице-президент С. Индержит, МФЖялъул казначей Джим Бумела, ЮНЕСКОялъул генералияв директорасул гIакълучи Генрих Юшкявичюс, ОБСЕялъул СМИязул эркенлъиялъул рахъалъ вакил Дуня Миятович, Финляндиялъул, Болгариялъул Журналистазул союзазул вакилзаби.

"Жакъа божилъиялъулаб гара-чIвари къваригIун буго дунялалъего, — ян абуна данделъи рагьулаго Россиялъул Журналистазул союзалъул председатель Всеволод Богдановас. — Улкабазда, батIи-батIиял пачалихъазда ругел цого ишалъул гIадамазда гьоркьоб кьал ва дандеккунгутIиял лъугIизариялъе къваригIун буго божилъи. Гьединго гьеб хIажат буго журналазул ва газетазул цIалдолезда, радиоялъухъ гIенеккулезда, телевизоралъухъ балагьулезда гьоркьобги". Дагъистаналъул вакилзабаз гIахьаллъи гьабуна тIоритIулел киналго тадбиразда. Мисалалъе, "Россиялда мацIазул политика ва гIурус мацIалъ кколеб бакI" абураб дандеруссиналда бицана улкаялъул регионазда бугеб масъалаялъул. Кин цIунилел гIурус ва Россиялъул халкъазул цогидал мацIал? Ва гьеб суал тIубаялъулъ журналистазул гIуцIиялъ кинаб бакI кколеб? Дагъистаналъул рахъалдасан кIалъана республикаялъул бетIерасул гIакълучи Денга Халидов, "ХIакъикъат" газеталъул бетIерав редакторасул заместитель Зикрула Ильясов. Гьез бицана Дагъистаналда гIурус мацI цIуниялъе чанго программа хIадур гьабун букIиналъул, гьединго Дагъистаналъул халкъазул мацIалда СМИязул ва гьел мацIал лъазариялъул бугеб масъалаялъул.
Форумалда цо-цо регионаз рихьизаруна жидерго СМИял. Гьел ккола Ставрополь край, Липецк, Тюмень, Нижегородск областал, Чачан Республика. Дагъистаналъул вакиллъиялъ гIахьаллъи гьабуна чачаназул СМИязул презентациязулъги. Бурлият Токболатовалъ ва ГIали Камаловас бицана 2003 соналда Чачаналда Журналистазул союз гIуцIиялъулъ Дагъистаналъул СЖялъул букIараб кIваралъул ва мадугьалихъ ругел республикабазулгун ругел бухьеназул.
Фестиваль лъугIизегIан "Дагомыс" выставкабазулгун презентациялъулаб майданалда хIалтIулеб букIана нилъер республикаялъул СМИял рихьизарулеб экспозиция, гьединго гIуцIун букIана "Дагъистан" издательлъиялъулаб рукъалъ ричулел тIахьазул выставка, Дагъистаналъул устарзабазул тIагIел-алатал.

Форумалъул бищунго ракIалда чIолел лахIзаталлъун рукIана журналистазулгун регионазул бутIрузул дандчIваял. СМИязул вакилзабигун дандчIварав Абхазиялъул бетIер Рауль Хаджимбаца абуна Абхазия букIине бугин лъидаго бачIеб пачалихълъун. Ингушетиялъул бетIер Юнусбег Евкуровас бицана республикаялда туризм цебетIеялъул, хIижабал ретIиналъул, улкаялъул цогидал регионазда гIолилал кин хьвада-чIвадизе кколелали ва гIемераб цогидалъулги.

Культура ва социалияб рахъ, тIубараб гражданияб жамгIият гIуцIи, гьеб жамгIияталъулъ щивасул бугеб кIвар, СКФОялъул субъектазул гьоркьоблъи, жамгIияталъулъ миллиял идеяби гIуцIи ва цогидалги гIемерал суалал гьоркьор лъуна Дагъистаналъул бетIер Рамазан ГIабдулатIиповас журналистазулгун букIараб дандчIваялда.
"КIиго соналда жаниб республикаялъул киналго районазда рагьана Россиялъул халкъазул гIадатазул культураялъул централ. Щай гIадатазул? Щайгурелъул, жамгIияталъул пикруялъе асар гьабула гIадатазул культураялъ. Цогидал — информациялъул, экономикаялъул рахъаз кумек гьабула дунял бичIчIиялъе", — ян абуна гьес.
Хадуб Р. ГIабдулатIиповас бицана Дагъистан цебетIеялъе лъабго соналда жанир гIумруялде рахъинарурал ва хIадур гьарулел ругел проектазул.

— Проектазул пакет хIадур гьабун букIана Москваялъул бищунго лъикIал программабазул кьучIалда. Гьединлъидал лъабго соналда жанир ниж хIалтIулел руго гьеб кинабго гIумруялде бахъинабиялда тIад. Лъабго соналда жаниб нижеда бихьулеб буго лъикIаб рахъалдехун ккарал хиса-басиялги, — ян абуна гьес ва журналистазул суалазе кьуна жавабал.

Фестивалалда нилъер делегациялъул гIахьаллъиялъул хIакъалъулъ ГI. Камаловас гьадин бицана: "Дагъистаналъул Журналистазул союзалъ 16-абилеб нухалда гIахьаллъи гьабулеб буго Россиялъул журналистазул фестивалалда. Чанго нухалда презентациял гьаруна Дагъистаналъул прессаялъул. Нижеца тIоритIулел тадбиразулъ жигараб гIахьаллъи гьабулаан кидаго Россиялъул журналистазги. Ахирал соназда нижеца гьел тIоритIулаан Россиялъул миллияб прессаялъул академиялъул ва "Кавказалъул рукъалъул" нухмалъиялда гъоркь. Гьезул учредителал ккола Россиялъул халкъазул ассамблея, Россиялъул ва Дагъистаналъул журналистазул союзал. Гьенир гьоркьоре уна Северияб Кавказалъул миллияб прессаялъул киналго редакциялги.

Исана букIана чачаназул прессаялъул презентация. Нижеца гьоркьоб лъун букIана прессаялъул кумекалдалъун миллиял мацIал цIуниялъул суал. РакIалде ккола, "Кавказалъул рукъалъул" хIалтIул бищунго аслияблъун ва кIвар бугеблъун кканин Абхазиялъул президент Рауль Хаджимбагун, Дагъистаналъул бетIер Рамазан ГIабдулатIиповгун ва Ингушетиялъул бетIер Юнус-бек Евкуровгун дандчIваял тIоритIи.

Абхазиялъул президентас абуна "Кавказалъул рукъалъул" хадусеб дандчIвай Абхазиялда тIобитIизе ккелин. Гьединабго данделъи гьабизе ракIалда буго Ингушетиялдаги.

Рамазан ГIабдулатIиповас исана лъабабилеб нухалда гIахьаллъи гьабулеб буго "ТIолабго Россия" фестивалалда. Гьесухъ гIенеккизе рачIуна батIи-батIиял регионаздаса журналистал. Гьединал дандчIваяз кумек гьабула мадугьалихъ ругел республикабазда гьоркьоб гьудуллъи щулалъиялъе, цоцада ричIчIиялъе".

Фестиваль къаялъулъ гIахьаллъана ЮНЕСКОялъул генералияв директорасул заместитель Франк де ля Рю ва къватIисел пачалихъаздаса рачIарал гьалбал. Рихьизаруна Россиялъул Журналистазул союзалгун хIалтIизе ракIалда бугел проектал. Ахиралда, конкурсалда бергьарал гIахьалчагIазе кьуна мустахIикъал сайгъаталги. Гьезда гьоркьор рукIана нилъер газеталги: "Дагестанская правда", "Молодежь Дагестана", "ХIакъикъат", гьединго "Дагъистан" РГВК телеканал.