Цо гIарцул ва цо мазгарул медалал щварал нилъер республикаялъул тхэквондистаз жидерго бутIа лъуна турниралда Россиялъул тIаса бищараб командаялъе лъабабилеб бакI щвеялъулъ. WTFалъул президентасул Кубокалъе гIоло турнир тIобитIана кIиабилеб нухалъ (гъоркьиса гьеб тIобитIун букIана Германиялда).

Гьениб гIахьаллъи гьабуна тIолабго дунялалдаса къуватал тхэквондистаз: Олимпиялъул хIаязул, Европаялъул ва дунялалъул чемпионазги. Гьеб турниралде спортсменазул гьединаб кIудияб интерес букIиналъе гIилла ккола турниралда призалъулал бакIал щваразе исана Европаялъул чемпионаталда гIахьаллъиялъе путевкаби щолел рукIин. Ункъо къоялъ тIобитIараб гьеб турниралда призалъулал бакIазе гIоло къеркьолел рукIана 51 улкаялдаса 2000-ялдаса цIикIкIун лъабго ригьа-лъул спортсменал: гIолилал, юниорал ва чIахIиял, хъвалеб буго "ХIакъикъат" казияталда.

Грециялде ун букIараб Дагъистаналъул команда гIуцIун букIана 20 спортсменасдаса. Гьенире ун рукIана щуго тренерги: Къурбан Бугдаев, Арсен МухIамадов, ХIусейн Дандов, ХIусейн МухIамадов ва Сария МухIамадова. Бихьизабизе ккола гьединаб къадруяб халкъазда гьоркьосеб турниралде Дагъистаналъул тIасабищараб команда гьединаб коллективгун гIуцIараб къагIидаялъ тIоцебесеб нухалъ ун букIанилан. Гьелъие квербакъана, халкъазда гьоркьосел къецазул хIалбихьи гьечIого Дагъистаналдаса спортсменазе тIадегIанал хIасилал щвезе захIмалъизе букIин бичIчIулев, Дагъистаналъул Тхэквондоялъул федерациялъул президент ГIалибег Сулеймановас. ГIарцулав презерлъун вахъана МухIамадрасул ГIумаров (63 кг, хасав тренер Асадула МухIамадов). Гьесие ихтияр щвана Европаялъул чемпионаталда гIахьаллъизе. Мазгарул медаль щвана ГIайна Мирзаевалъе (33 кг, хасай тренер Сария МухIамадова). Дагъистаналдаса жеги ункъо спортсменазе щвана ункъабилел бакIал.

Гьеб турниралда хIалуцараб къеркьей букIараблъиялъе нугIлъи гьабула Рио-де-Жанейроялъул олимпиялъул чемпион Радик ГIисаевасецин гьениб кIиабилеб бакI щвеялъ.

Дагъистаналъул тIасабищараб юниоразул командаялъул тренер Арсен Къурбановас хIасилал гьаруна къецазул: "Гьеб букIана нилъер спортсменал гIахьаллъараб тIоцебесеб кIудияб турнир. Дагъистаналъул Тхэквондоялъул федерациялъул цIияв президентлъун ГIалибег Сулейманов вачIаралдаса спорталъул гьеб тайпаялде гьабулеб бербалагьи лъикIаб рахъалдехун хисана. ЛъагIелалъ 8-10 къецазда гIахьаллъулел спортсменаздасаги бергьун, дагъистаниязе щварал медалаз нугIлъи гьабула Дагъистаналъул тхэквондоялъул школалъухъа Европаялъул ва дунялалъул тхэквондоялъул школазулгун къец базе бажарулеб букIиналъе. Нилъер гIолилазе гIолеб гьечIо халкъазда гьоркьосел къецазул хIалбихьи. Хьул буго гьезие гьеб хIалбихьи хадубккун щвеялде", — ян абуна гьес.