2008 соналда Пекиналда тIоритIарал Олимпиялъул хIаязда 120 килограмм цIайиялда гIарцул медаль щун букIана Дагъистаналдаса гугарухъан, Россиялъул спорталъул мустахIикъав мастер Бахтияр АхIмадовасе. Халкъазда гьоркьосеб Олимпиялъул комитеталъ (МОК) 2008 соналда Пекиналда рукIарал Олимпиялъул хIаязул хIасил гьабидал, МОКалъ хIукму гьабуна финалалда Бахтияргун гугарулев вукIарав Артур Таймазовас допинг, ай гьукъараб жо — трибанол хIалтIизабун батиялда бан, Олимпиялъул хIаязда щун букIараб меседил медалалдаса гьев махIрум гьавизе ва медаль Бахтияр АхIмадовасе кьезе, хъвалеб буго "ХIакъикъат" казияталда.

"Гьеб букIана дие тохлъукьегояб лъугьа-бахъинлъун. Дун чIухIарав вуго Олимпиялъул меседил медаль нилъер улкаялде бачIиналдаса. Спортсмен хIисабалда дие гьеб буго кIудияб къадру", — ян абуна АхIмадовас.

Гьес пашманлъи загьир гьабуна киналго спортсменазе бищунго кIвар бугеб бергьенлъи битIахъего Олимпиада тIобитIулеб мехалда щвечIолъиялдаса.

"Олимпиялъул хIаязул финалалда Таймазовгун гугарун хадуб дирги, гьединго Россиялъул тIасабищараб командаялъул тренеразулаб штабалъулги жаваб щвечIел суалал хутIана нижер финалияб дандчIваялда суд гьабулеб букIараб бригадаялъе. Нижер пикруялда рекъон, кIиабилеб периодалда цохIого цо балл Таймазовас босун букIана дандчIваялъул заман лъугIидал. Гьелъги дандчIваялъул хIасилалъе битIахъегояб асар гьабуна. Гьеб кигIан захIматго букIаниги дица сабру гьабуна. Артурил кверги бачун, дун ургуялдаса нахъе ана", — ян лъазабуна АхIмадовас.