Каспийскалда, ГIали ГIалиевасул цIаралда бугеб спортивияб кIалгIаялъуб, тIобитIана спортсменазулгун дандчIвай.

Россиялъул аслиял ва къватIисел улкабазул ММА-лигабазда журарал единоборствабазул рахъалъ къецазда цере рахъунел Дагъистаналъул спортсменазда бергьенлъаби баркизе ва шапакъатал кьезе гьезулгун дандчIвай тIобитIана щуабилеб апрелалда ГIали ГIалиевасул цIаралда бугеб спортивияб кIалгIаялъуб.

Гьенир шапакъатал кьуна UFC, М1 Challenge, WSOF ва ProFC организациязул къецазда гIахьаллъулел ва лъикIал хIасилал ккарал спортсменазе. Ахирисеб организациялъул кьеразулъ цере рахъуна Артур ГIалибулатов ва Вагьаб Вагьабов. 26 марталда тIобитIараб ProFC 62 турниралда гьев кIиясго бергьенлъаби росана дандчIваялъул аслияб заман лъугIилелдего.

Ростовалда тIобитIараб гьеб турниралда, ушу-саньдаялъул ва кикбоксингалъул рахъалъ дунялалъул чемпионаталда бергьарав, Россиялъул спорталъул мустахIикъав мастер Артур ГIалибулатов тIокIлъигун бергьана беларусав Борис Мирошниченкодаса. Боксалъул, кик-боксингалъул ва рагъулаб самбоялъул рахъалъ спорталъул мастер Вагьаб Вагьабовги гьеб турниралда бергьана лъабабилеб раундалда Россиялъул спортсмен Алексей Ефремовасдаса.

Гьеб дандчIвай гIуцIарав бизнесмен Рустам ГIабдулаевас спортсменал кIодо гьаруна къиматал сайгъатаздалъун ва ракIалдещвеялъе кьуна сувенирал. Шапакъатал кьуна журарал единоборствабазул рахъалъ цIар рагIарал спортсменал Рашид Юсуповасе, Шамил ГIабдурахIимовасе, Тимур Валиевасе, Бекбулат МухIамадовасе, Мурад ЗайнулгIабидовасе, Шамил ГIабдулхаликъовасе, ГIали ГIисаевасе, Рустам ХIажиевасе; тренерал МухIамад МухIамадовасе, Рустам Асилдаровасе, Сухраб МухIамадовасе ва МахIачхъалаялъул № 2 ДЮСШалъул директор МухIамад МухIамадовасе.