Премьер-лигаялда футболалъул рахъалъ Россиялъул чемпионаталъул 23-абилеб туралда 15 апрелалда "Анжи-Аренаялда" "Анжи" хIана Самараялъул "Крылья Советов" командагун. Турниралъулаб таблицаялъул 14-абилеб бакIалда бугеб Самараялъул команда къеркьолеб буго Премьер-лигаялда хутIизе гIоло, хъвалеб буго "ХIакъикъат" казияталда.

Цебесеб, 22-абилеб туралда Санкт-Петербургалда гьезул "Зенит" командагун хIаялъул хIасил ккана 1:1, ва "Анжиялъе" цо очко щвана. Амма "Анжи-Аренаялда" "Крылья Советов" командагун хIаялда "Анжиялъе" битIккечIо — гьеб къуна 1:3 хIисабгун. Жинда къисмат бараблъун гьеб къей МахIачхъалаялъул командаялъе букIинчIо, амма хадусел матчазда "Анжиялъе" бигьаял хIаял рукIине гьечIо. Гьеб хIазе буго турниралъулаб таблицаялда гьелдаса церехун ругел командабигун. Узухъда, лъикI буго турниралъулаб таблицаялъул цересел бакIазда ругел командабигун "Анжи" хIаракаталда хIалеб букIин, амма гьабсагIат "Анжиялъе" кIвар буго турниралъулаб таблицаялда жиндаса гъоркьехун ругел командабазулгун хIаязда очкаби роси.

Гьеб туралда "Анжи-Аренаялда" хIалаго самараялъулазе тIоцебесеб таймалдаго битIккана. Гьениб ичIабилеб минуталда Корниенкоца ва 23-абилеб минуталда Зотовас "Анжиялъул" кавабахъе рикIкIадасан кIиго торгIо кьабуна. Гьелъул гIайиб буго защитниказдаги. Гьебги бичIчIун, "Анжиялъул" бетIерав тренер Александр Григоряница, травма ккун букIун жеги тIубан формаялде вачIинчIев Сергей Брызгаловасул бакIалда, майданалде виччана Аяз Гулиев. Гьелдаса хадуб хIай дагьабго цокIаллъана. МахIачхъалаялъулаз кIиго гьужум гьабуна, амма торгIо кавабазул штангаялда щвана. КIиабилеб таймалда, 64-абилеб минуталда "Крылья Советов" командаялъул гьужумалъулав Паскулоца "Анжиялъул" кавабахъе цойги торгIо кьабуна. Гьеб хIасилалда махIачхъалаялъулал рази рукIинчIо, ва 89-абилеб минуталда Хубуловас гьалбадерил кавабахъе пенальти кьабуна. Гьедин хIай лъугIана 1:3 хIисабгун "Крылья Советов" командаялъул бергьенлъигун. 24-абилеб туралда, 22 апрелалда "Анжи" хIазе буго "Терек" командагун.