Марталъул байбихьуда Дагъистаналдаса цIар рагIарав речIчIухъан ХIабиб НурмухIамадов Америкаялъул UFC гIуцIиялъ тIобитIараб иргадулаб турниралъул аслияб къеркьеялда дандчIвазе кколаан Америкаялъул Цолъарал Штатаздаса спортсмен Тони Фергюсонгун, хъвалеб буго "ХIакъикъат" казияталда.

Амма гьелда дагъистаниявги америкаялъулавги къеркьечIо. ГIиллаги киназдаго лъала, чанго килограмм тIаса рехулаго, ХIабиб больницаялде ккана. Гьелдаса хадуб дунялалъулго батIи-батIиял информациялъул алатаз жидецаго хIалбихьана дагъистаниясдагун американасда гьоркьоб къеркьей букIине бугеб къо чIезабизе. Цояз маялда, цогидаз апрелалда букIине бугин ва лъабабилез гьел дандчIвазе гьечIинцин лъазабулеб букIана.

Гьал къоязда UFC гIуцIиялъул сайталда бачIараб информациялда рекъон, ХIабибидагун Тонида гьоркьоб къеркьей тIобитIизе буго сентябралда. ГьабсагIаталда Дагъистаналда вугев ХIабиб НурмухIамадовас лъазабулеб буго жив бокьараб заманалда рингалде вахъине хIадур вугин.