Гьал къоязда Брянскалда тIобитIана журарал единоборствабазул рахъалъ FIGHT NIGHTS GLOBAL турнир. Абизе ккола, ахираб заманалда рехсараб промоутеразул компаниялъ Россиялъул батIи-батIиял регионазда тIоритIулел руго лъикIаб даражаялъул турнирал. Гьединабго букIана дагьаб цебе Каспийскалда ГIали ГIалиевасул кIалгIаялда тIобитIарабги, хъвалеб буго "ХIакъикъат" казияталда.

FIGHT NIGHTS компаниялъул нухмалъулел Дагъистаналдаса рукIиналъги батизе бегьула, гьелъ тIоритIулел къеркьеязда гIемерисел нилъерал цере рахъунелги. Гьале гьаб нухалъги Брянскалда букIараб турниралда рингалде вахъана чанго дагъистанияв, ва дандиязда тIад ракIчIараб бергьенлъи босана ХIажимурад ХирамухIамадовасги ИсхIакъ ГIалиевасги.

83,9 кг цIайиялда цеве вахъунев ХIажимурад рехсараб турниралда дандчIвана Гуржиялдаса Георгий Лобжанидзегун. Регламенталда бихьизабураб лъабабго раундалдаги къеркьон, судиязул хIукмуялдалъун Лобжанидзедаса нилъерав бергьана. ХIалуцараб къеркьеялдаса хадуб судияз бергьенлъи кьуна ИсхIакъ ГIалиевасеги. Гьесин абуни чIел босана Роман Ткаченкода тIад.