2017 соналъул 16 декабралда МагIарулазул театралда тIобитIана шагIир, драматург, маданияй хIаракатчIужу Машидат Гъайирбеговалъ 90 сон тIубаялъул хIурматалда данделъи, — ян хъвалеб буго ГIизудинил ХIамзатица "Миллаталда".

Машгьурай шагIир Машидат Гъайирбеговалъул адабияталъул сордо чIаго гьабуна Дагъистаналъул Хъвадарухъабазул союзалъул нухмалъулев, халкъияв шагIир МухIамад АхIмадовасул, ГIахьвахъ районалъул нухмалъулев МухIамадзагьид Муслимовасул, «Лотос» басмаханаялъул нухмалъулев МухIамад МухIамадовасул, шагIирзаби ТубхIат Зургьаловалъул, гьелъул музеялъул нухмалъулей Каримат ГъалбацIовалъул, гIахьвалазул школазул ва гьединго Генуб гьоркьохъеб школалъул цIалдохъабазул кIалъаяз ва церерахъиназ.

2017 сон ГIахьвахъ районалда лъазабун букIана Машидат Гъайирбеговалъул лъагIеллъун. Гьелъул асарал ракIалдасан рикIкIиналъул къецал тIоритIана, цIалдолезулгун дандчIваял ва цоги тадбирал гIумруялде рахъинаруна ГIахьвахъ исана.


Машидат Гъайирбеговалъул Шамил имамасул хIакъалъулъ хъвараб поэмаялда такрарлъулел руго магIна гъваридал ва чIванкъотIарал, камилал рагIаби:

Шамил имам — дир чIухIи,

Шамил имам — дир бухIи.

Гьеб чIухIигун ва бухIигун гIумру тIамуна Шамил имамасул наиб Тавуш-мухIаммадил ирсилай Машидат Гъайирбеговалъ. Гьелъ нахъе тарал асаразул аслияб бутIа нилъер магIарул халкъалъул ва Дагъистаналъул тарихалъулъ мустахIикъаб бакIалда буго.