"Юнармия" абураб ТIолгороссиялъул рагъулабгун патриотикияб хIаракаталъул Дагъистаналъул регионалияб отделениялъул вакилзабаз абулеб буго ахирал соназда улкаялда гIуцIулеб "Хвел гьечIеб полк" абураб тадбиралда цIар хисизе бегьулин.

Гьезул пикруялда, лъикIаб букIинаан "Хвел гьечIеб полк — КIудияб Бергьенлъиялъул ирсилал" абураб цIаралдалъун гьеб хисани. "Хвел гьечIеб полкалъул" централияб штабалде, гьеб пикруги загьир гьабун, хитIаб гьабизе ракIалда бугин бицана Рамазан ГIабдулатIиповас.
"Нилъеца цоги нухалда бетIер къулулеб буго КIудияб ВатIанияб рагъул бахIарзаздаги захIматалъул фронталда свак тун хIалтIарал дагъистанияздаги цебе. Рагъул щивав гIахьалчи нилъее багьадур вуго", — ян абуна гьес.