26-27 апрелалда Дагъистаналда тIобитIана "ЦIияб качество — цIиял мурадал" абураб лъайкьеялъул форум.

ДРялъул бетIерасул аслияб проект гIумруялде бахъинабиялъул мурадалда форум гIуцIана ДРялъул хIукуматалъ ва ДРялъул Лъайкьеялъул ва гIелмуялъул министерствоялъ. Гьелда гIахьаллъана ДРялъул бетIер Рамазан ГIабдулатIипов, Рособрнадзоралъул нухмалъулесул заместитель Анзор Музаев, ДРялъул вице-премьер Екатерина Толстикова, республикаялъул лъайкьеялъул идарабазул нухмалъулел, педагогал ва гIалимзабигун методистал. Дандеруссиналде рачIун рукIана муниципалитетазул бутIрулги, хъвалеб буго Кавсарат Сулеймановалъ.

Данделъиялъул гIахьалчагIазде саламалъул хитIаб гьабуна ДРялъул бетIер Рамазан ГIабдулатIиповас. Гьес лъикIаб къимат кьуна республикаялъул Лъайкьеялъул ва гIелмуялъул министерствоялъул хIаракаталъе. "Федералиял программабазул кумекалдалъун нилъехъа бажарана лъайкьеялъул идарабазе цIиял минаби разе. Гьанже къваригIун буго гьенир цIалулел лъималазе лъикIаб качествоялъул лъай кьезе. Гьеб масъала тIубазабизе республикаялде ахIун йиго Екатерина Толстиковаги", — ян бицана регионалъул нухмалъулес.

Республикаялъул нухмалъиялъул квербакъиялдалъун Дагъистаналъул лъайкьеялда лъикIал хиса-басиял ккараблъи бичIчIизабуна Анзор Музаевасги. "Ункъабилеб сон буго Дагъистаналда ракIбацIцIадго ЕГЭ тIобитIулелдаса нахъе. Гьеб лъикIаб хIасил ккола. Лъайкьеялъул форум тIобитIиги педагогаз цоцазе хIалтIул хIалбихьиялъул бицине Дагъистан тIасабищиги буго лъайкьеялда ккарал хиса-басиязул хIасил", — ан абуна гьес.

ЦIикIкIараб кIварбуссинабизе ккола росабазул школал церетIезариялдеян абуна Екатерина Толстиковалъ. "Дагъистаналда буго 1454 школа, гьезда гьоркьоса 1285 школа буго росулъ, ай цIалдохъабазул 60 проценталдаса цIикIкIараб къадар росдал школалда цIалулеб буго. Гьединлъидал жигар бахъизе ккола росабазулъ ругел школазул лъайкьеялъул централ гьаризе", — ян абуна вице-премьералъ.

Форумалда бицана Дагъистаналъул педагогазул ассоциация гIуцIизе бугиланги. БатIи-батIиял дарсазул ассоциациялги гIуцIун, гьезул нухмалъулелги рищана хасаб данделъиялда. ХIадурун руго гьезул хIалтIул лъагIалил планалги.
Ассоциациязул аслияб хIалтIул ва гьел гIуцIиялъе ккараб гIиллаялъул хIакъалъулъ данделъиялда бицана МахIачхъалаялъул №28 школалъул директор Анжела Байрамбеговалъ. "Ассоциациялда цебечIараб аслияб масъала буго учителасул махщел камиллъизаби, гьел рукIине руго лъайкьеялъул форумазул гIуцIарухъабилъунги", — ян абуна гьелъ.

Форумалъул хIалтIи хадубккун тIобитIана 11 батIияб секциялдеги бикьун. Гьезул хIакъалъулъ макъалаби рахъизе руго хадусел номеразда. Масала, нилъее кIудияб кIвар бугеблъун ккола рахьдал мацIал церетIезариялъул хIакъалъулъ бицараб дандеруссин.