25 апрелалда Агъваливе вачIун вукIана Дагъистаналъул хIукуматалъул председатель ГIабдусамад ХIамидов ва гьесул заместитель Рамазан Жапаров. Гьел дандчIвана районалъул бетIер АнвархIажи Вечедовгун. Данделъиялда гIахьаллъана мугIрузул территориалияб округалда вугев Дагъистаналъул бетIерасул вакил МухIамад Камилов, районалъул прокурор Иляс Вакилов ва жанисел ишазул районалда бугеб отделалъул начальник Элдар МухIамадов, хъвалеб буго Хадижат Залимхановалъ.

Гьениб бицана компьютеразул залалда граната кьвагьиялдалъун ккараб балагьаб лъугьа-бахъиналъул хIакъалъулъ. Гьениса гьалбал ана лъукъа-къотIи ккарал лъималазде раккизе больницаялде. Бугеб ахIвал-хIалги лъазабун, ГIабдусамад ХIамидов ва Рамазан Жапаров ана Гъоркьгьаквари росулъе, гьеб балагьаб лъугьа-бахъиналъул хIасилалда Аллагьасул къадаралде щварав Насрудинов МухIамадрасулил эбел-инсуда ва гIагарлъиялда зигара базе.

Кин батаниги, талихIкъосараб лъугьа-бахъин ккана магIарул росулъ. Аллагьас цIунаги гьединал балагьаздаса, амма гьелъул хIасил гьабичIони, гьединал ишал цогидал бакIаздаги ккеларин лъидаго абизе кIоларо.

ДРялъул СахлъицIуниялъул министерствоялдасан щварал баяназда рекъон, гьал къоязда цо вас больницаялдаса рокъове виччан вуго. Больницаялде ккаразул анкьгоязул квешаб хIал рагIуларо. МахIачхъалаялъул больницаялде рачарал лъабгоязухъ халгьабуна Санкт-Петербургалдаса рачIарал тохтурзабазги. Гьез хIукму гьабуна лъимал бакIалдаго тезе, щайгурелъул, Москваялде яги цогидаб шагьаралъул больницаялде рачине ккараб хIал гьезул рагIуларо.