Оцбаялъул къо кIодо гьабулеб гIадат хвезе течIого цIунун буго ЧIарада районалъул Гьочоб росдал жамагIаталъги. Гьал къоязда гьеб байрам тIобитIана гьочосез ва, росдал дибир ГIабдуразакъов Шамилица дугIа-алхIамги гьабун, бана чанго рахъ. Хадуб гьев хисана жамагIатчи МахIачев МахIачица, ва гьелдаса хадуб пурцил гIоркь ккуна тадбир тIобитIиялъул иш тIаде босарав школалъул директор АхIматIилов ГIабдулахIажияс.

Гьеб тадбиралде Гьочоре рачIун рукIана шагьаразда, хъутаналда гIумру гьабун ругел росуцоялги, ахIун рукIана Шамил районалъул Къелеса вакилзабиги.

Гьелдаса хадуб росдал клубалда зурма-къолол гьаркьида гъоркь свераби рахъана росдал гIадамаз. КучIдул ахIана ХIажибегов Шамхалица, ГIумаров ГIумарица, ХIажиев ГIабдулхIакимица. Тадбиралъул "хважаинас" щибаб лъимадуе кьуна расанкIо, гьезул эбел-инсуца бикьана батIи-батIияб нигIмат. Дибирас киназего дугIаги гьабуна. Цинги байбихьана спорталъул къецал. Гиря борхун бергьана ЖабрагIилов МухIамадкарим, гамачI рехун — АхIмадов ГIазиз. Квар цIан бергьана махIачхъалаялъулал. ТоргIо хIан тIоцебесеб бакI ккуна МахIачхъалаялъул командаялъ, кIиабилеб бакI — росдал командаялъ ва лъабабилеб бакI щвана къелдерил командаялъе. Бергьарал кIодо гьаруна сайгъаталги кьун.

Росулъ, ахирал соназда, гьеб тадбир тIобитIулеб буго кIиабилеб нухалда. ГIадатлъун билълъараб гьеб байрам тIобитIулеб букIинчIо анцIгоялда цIикIкIун соналъ. Гьанжейин абуни тIобитIулеб буго кинабгIаги гьекъолел жалги гьечIого. ТIадеялъул тадбир тIобитIизе тIаде босулев чи ккезегIан, гIадаталда рекъон, хъураб оцол бетIер кьуна бегавул Бегов ГIумарасхIабихъе.
Сайпула ГьитIинамухIамадов