МахIачхъалаялда бугеб Гьудуллъиялъул рокъор данделъун рукIана Северияб Кавказалъул республикабаздаса, Сириялдаса, Калмыкиялдаса, Иркутск областалдаса ва Крымалдаса рачIарал диниял церехъаби.

ДРялъул бетIер Рамазан ГIабдулатIиповасул цIаралдасан конгрессалъул гIахьалчагIазе салам кьуна Дагъистаналъул хIукуматалъул председателасул заместитель Рамазан Жапаровас. Гьадинал тадбираз Кавказалда рекъел, мадугьаллъиялъул ва вацлъиялъул гьоркьорлъаби цIуниялъе квербакъулин абуна вице-премьерас.

"Зулмуялъул, жагьиллъиялъул, экстремизмалъул ва терроризмалъул захIмалъаби къуваталъул кумекалдалъун тIуразе бажаруларин абураб пикру буго нижерги Диниял идарабазул вакилзабазулги. Гьел захIмалъаби къезаризе ккола исламалъул умматалда жанир лъугьун ругел батIи-батIиял диниял рикьалабазда гьоркьоб диалогги тIобитIулаго", — ян лъазабуна Рамазан Жапаровас.
ДРялъул муфтиясул заместитель АхIмад Кахаевас бицана бусурбабазул церехъабаз гIемераб хIалтIи гьабулеб бугин жамгIият рухIияб рахъалъ цебетIеялъе, лъай кьеялъе ва цолъи щула гьабиялъе. "Амма диниял гIуцIабаз кигIан хIаракат бахъаниги, щивас жинди-жиндир рокъоб рухIияб тарбия кьолеб гьечIони, гIолеб гIел жибго жиндаго чIун гIумру гьабизе заман щведал, хъизаналъул жавабчилъи тIаде босизе бажарулареблъун лъугьунеб буго. РухIияб ва яхI-намусалъул тарбия щвезе ккола лъималазе эбел-инсудасан", — ан абуна гьес.

Конгрессалда гIахьаллъизе рачIун рукIарал Дагъистаналъул исламиял цIалул идарабазул студентазе ва мугIалимзабазе вагIза гьабуна Сириялдаса шаригIаталъул гIелмабазул доктор, шайих МустIафа Диб ал-Бугаца. Гьес бицана, киб бакIалда гIумру гьабун ругониги, бусурбабаз цоцазе квербакъизе, лъикIаб гIамалалдалъун цогидазда мисал бихьизабизе кколин.

"Нужее лъица букIаниги зарал гьабуни, гьебго къагIидаялъ жаваб гьабизе бегьуларо, гьелъул гIаксалда, лъикIлъи гьабизе ва гIадан вичIчIизе хIаракат бахъизе ккола. Гьеб мехалда тушманцин гьудуллъун лъугьине рес буго",- ян абуна МустIафа ал-Бугаца.

МухIамад аварагасул (с.гI.в.) хIадисалги рехсолаго, шайихас гIолилаздехун хитIаб гьабун абуна цогидал диназул, мадугьалзабазул ва гIага-божаразул тIалаб гьабизе гIоло пайда босейин аварагас гьарурал малъа-хъваяздаса.

"Северияб Кавказалъул халкъазул цебетIей ва бечедаб культура цIикIкIин бараб буго бусурбабазул диниял жамгIиял гIуцIабаз, гIелмияб интеллигенциялъ, пачалихъалъ ва ватIанчагIаз гьелъие гIоло цадахъ рекъон хIаракат бахъиялда. Нижеца лъикIаблъун рикIкIуна бусурбабазул жамгIияталъулъ рикьалаби гьаризе хIалбихьулезде дандечIезе гIоло Россиялъул бусурбабазул умматалда гьоркьоб цоцазда ричIчIиялъе нухал ратизе. Северияб Кавказалъул халкъазе хасиятаб хъизаналъул къадру цIуни кIочене биччачIого гIолилазда гьоркьоб щула гьаби. Гьеле нилъер аслияб иш. Дунялалъулго бусурбабазул гIуцIабазул хIалбихьиялдаса мисалги босун, исламияб лъайкьеялъул цогояб къагIида гIуцIизе ккола", — ян хъвалеб буго конгрессалъул гIахьалчагIаз къабул гьабураб хитIабалдаги.
ПатIимат СултIанмухIамадова