Ахираб ункъо соналда жаниб промышленнияб производствоялъул къадар кIицIул цIикIкIанин лъазабуна ДРялъул промышленносталъулгун дармил министр Юсуп ГIумавовас.

«Исана «Дагдизель» заводалъул производство цIикIкIана 2,9 нухалъ, ХIажиевасул цIаралда бугеб заводалъул — 1,6 нухалъ, «Концерн КЭМЗ» ОАОялъул ва «Азимут» ПО ОАОялъул — 1,7 нухалъ. Гьел предприятияз къватIибе кьураб къайиялъухъ ва гьарурал цогидал хъулухъазухъ январалдаса ноябралде щвезегIан щвана 46,5 млрд гъуруш. Заводазда гIуцIана 311 хIалтIул бакI, гьезда гьоркьоса 225 ккола тIадегIанаб технологиязул кьучIалда гIуцIараб. Киналго бюджетазде гьез кьуна 8 млрд гъуршидаса цIикIкIун налогги — цебесеб соналде дандеккун, 22,5 проценталъ цIикIкIана гьебги», — ян бицана министрас.