29 ноябралда лицеялъул цIалдохъабаз бицана школалъул тарихалъул хIакъалъулъ, бихьизабуна тарихалъул тIанчаздаса гIуцIараб видеомонтажги. ТIоцебе щуабилеб школа букIана Ногинил цIаралда бугеб клубалда. 1936 соналда гьелъие бана цIияб мина. КIудияб ВатIанияб рагъ байбихьидал, республикаялъул цогидал школаздаго гIадин, гьенибги рагьана госпиталь.

Бергьенлъиги босун, ракьцоял ракълилаб гIумруялде тIадруссана. Школалдаги байбихьана дарсал кьезе, гIолеб гIел куцазе. ЦокIалго гIуцIараб школалъул хIалтIи гьоркьоб къотIизабуна 1970 соналда Дагъистаналда ракь багъариялъ. Школалъул минаялъул лъабабилеб тIала тIубанго биххана. Бана школалъе цIияб мина. ЦIидасан ругьунаб ишалде руссана учительзабигун цIалдохъаби.
Гьеб киналъулго бицунеб байрамалда букIана цIалдохъабазул церерахъинги. Гьениб бицана учительзабазул хIалхьи гьечIеб жигаралъул хIакъалъулъ, ахIана кечI, гьабуна кьурди-хъат. Цинги церерахъинаруна ахирал соназда спорталда чIчIел босарал лицеистал. Гьезул къадаралъ битIахъе бербиххизабулеб букIана: тIолабго сцена занкIун цIезабуна каранда медалал рарал васазгун ясаз.

РФялъул лъайкьеялъул отличник, ДРялъул мустахIикъай учитель Равзанат Асадулаевалъ нухмалъи гьабулеб лицей шагьаралъул лъайкьеялъул идарабазул цебехъанлъун, республика машгьур гьабулеб къебелъилъун кколин абуна ДРялъул лъайкьеялъул министрасул заместитель ХIажимурад ГIалиевас, МахIачхъала шагьаралъул бетIерасул заместитель Запир Алхасовас, МахIачхъалаялъул лъайкьеялъул управлениялъул нухмалъулесул заместитель Элмира Рамазановалъ. ДРялъул Лъайкьеялъул министерствоялъул, тахшагьаралъул администрациялъул ва МахIачхъалаялъул лъайкьеялъул управлениялъул рахъалдасан шапакъатал, хIурматиял цIарал ва баркалаялъул кагътал кьуна лицеялъул учительзабазе.

"БурутI" гьумер хIадурулей нижер мухбир, №5 гIемерпрофилияб лицеялда магIарул мацIалъул дарсал кьолей учительница ГIайшат ХIалакъовалъеги щвана "ДРялъул лъайкьеялъул отличник" абураб каранда балеб гIаламат.
"ХIакъикъат" газетаялдаса босараб