Дида Дибир-хIажи Дибиров лъала 1980 соналда "БагIараб байрахъ" газеталде хIалтIизе вачIаралдаса нахъе. БачIинахъего гьесулгун лъикIаб гьоркьоблъиги ккана. Абизе ккола, дол соназда редакциялда бищун гIолохъанав мухбир вукIиналъги, коллективалъ дун лъикI къабул гьавунин. Дибир-хIажица, Шахтаманов МухIамадсултIаница, Хаджаев МухIамадица, Каримов ТIагьирица дие гIемерал малъа-хъваял ва кумек гьабулаан. Цо къадаралда Дибир-хIажиги дунги гIагар гьаруна, районал батIиял рукIаниги, гьоркьоб росу гьечIого, мегIер-ракь гIорхъода ругел росаби гьесул МестIерухъги дир ТIаса-Бакълъухъги рукIиналъги.

Дибир-хIажи Дибиров гьавуна 1926 соналъул 8 декабралда ГIахьвахъ районалъул МестIерухъ росулъ. АнцIго сон барав чи гьев вугеб мехалда, кулакилан цIарги чIван, мацIихъабазул "кумекалдалъун" гьесул эмен Дибир жанив тIамула. Дибир вукIана гIетI тIун, жиндирго захIматалдалъун магIишат гьабулев чи. Гьедин данде гьабураб хъизан хьихьизе гIураб чIара-хьараб гьоркьохъеб магIишатги бугев, ритIухъаб хасияталъул, кьучIаб рагIи-каламалъул Дибир росулъа цо-цо лотимахIазе рекIее гIолев вукIинчIев къагIидаха.

Хунзахъ-Хъаладухъ жанив тIамун вугев инсуда хадув эбелгун цадахъ чанцIулго хьвадана гьитIинав чи Дибир-хIажи ТIалакъоро магIардасан гьениве. Гьениб ахирисеб нухалда берчIвана инсуда. Араб бакI, хвел-хоб лъачIого, тIагIана гьев.

— Цо къоялъ эменгун дандчIвазе хьулалда Хъалаялъул кIалтIа чIун рукIана эбелги дунги, — ян ракIалдещвезабуна Дибир-хIажица. — Нижго гIадин рухIдалазда хадур рачIараз занкIун цIун букIана туснахъалъул кIалтIу. Цо заманалдасан халкъалда гьоркьоб гIажаибаб, сихIкъотIараб багъа-бачари лъугьана. Халкъ кIийиде бикьун, нух тана. "ХIасан-устар вачIунев вуго", "ХIасан-устар", — ан шуршур баккана. Ярагъ барав лъабго-ункъо чияс сверун ккун, Хъалаялъуве вачун ана гьев. Гьелде щвезегIан гьев дида я вихьарав, я рагIарав чи вукIинчIо. Жакъа къоялъги цебеса унаро гьесул берцинаб сипат, гьурмада букIараб динияб дангъва-кьер.

ГIагараб росдал НСШялда анкьго класс лъугIарав, анцIила анлъго сон балев Дибир-хIажи тIамула живго цIалараб школалда учительлъун. Гьеб букIана тIадбан рагъ унеб 1942 сон. Хадуб учительлъи гьабуна мадугьалихъ бугеб Ингердахъ росдал байбихьул школалда. Гьениса цIидасан тIадвуссун, чанго соналъ хIалтIана гIагараб росдал школалда.

Хъвадаризе махщелги, пагьму-гьунарги бугев Дибир-хIажица гьарулаан кучIдул, районалъул ва республикаялъул газетазде макъалаби хъвалаан. Гьев гIахьаллъана 1952 соналда МахIачхъалаялда тIобитIараб республикаялъул гIолохъанал хъвадарухъабазул лъабабилеб совещаниялда. ЛъикIаб къимат кьуна Дибир-хIажил кучIдузе гьениб. 1952 соналда тIоцебе бахъизе байбихьараб "Гьудуллъи" альманахалда бахъана чанго кечIги.

ГIурус мацIалдаги хъвадаризе махщел букIана гьесул. ГIолохъанал хъвадарухъабазул данделъиялде арав Дибир-хIажил лъай-хъвай ккола «Комсомолец Дагестана» газеталъул бетIерав редактор Павловалъулгун. Гьелъ Дибир-хIажида абула газеталде мухбирлъун хIалтIизе вачIаян. Павловалъе рекIее гIун ругоан гIолохъанав шагIирасул редакциялде гIурус мацIалда ритIун рачIунел рукIарал бегIерал макъалаби. Гьелъие разилъи кьурав Дибир-хIажи росулъе уна, редакциялъул ругьел щвезегIан. Амма редакциялдаса гьеб кагъат гьесухъе бачIунаро. Хадуб Павловалъ Дибир-хIажида бицана гьев кулакасул вас вугилан хъван бачIараб гIарзаялъ кинабго хвезабунин.
Кин бугониги шагьаралде вахъине ракI гьесарав Дибир-хIажи МахIачхъалаялде вачIуна ва 1957 соналда "БагIараб байрахъ" газеталъул редакциялде хIалтIизе лъугьуна. 1989 соналда пенсиялде инегIан, лъебергоялдаса цIикIкIун соназ хIалтIула газеталда, гьездасан ахираб къого соналда отделалъул заведующийлъун. Дибир-хIажи рикIкIунаан "БагIараб Байрахъалъул" бищунго махщелги гьунарги бугездаса цояв журналистлъун. Анкьго классалъул гурого лъайги гьечIев, партиялъул мухъазулъги вукIинчIев чи республикаялъул парторганизациялъул органлъун кколеб газеталда хIалтIиялъги гIемераб жоялъул бицуна. Дибир-хIажи ккола батIи-батIиял темабазда хъварал анцI-анцI макъалабазул, очерказул, фельетоназул, репортажазул ва захIматалъул церехъабазул хIакъалъулъ хъвараб лъабго тIехьалъул авторги.

СССРалъул Журналистазул союзалъул член, Дибир-хIажи Дибиров мустахIикълъана гIемерал шапакъатазе. Гьев ккола ДАССРалъул культураялъул мустахIикъав хIалтIухъан, тIабигIат цIуниялъул рахъалъ республикаялъул премиялъул лауреат, чанго нухалъ журналистазул конкурсаздаги бергьун, вахъана "Меседил перо" щварав лауреатлъун. Дибир-хIажие кьун буго "ХIурматалъул гIаламат" орденги, чанго медальги.

Жиндирго ункъоялда анцIго сон тIубаялъул юбилеялде Дибир-хIажица къватIибе биччана "КIиго яргъил цо ругъун" абураб саламатго кIудияб ва цIалдолез лъикI къабул гьабураб тIасарищарал очерказул тIехь. Ункъоялда анцIго сонил чIалде ваханиги, чорхол сахлъиялда, рекIел чIаголъиялда вуго жеги Дибир-хIажи. Гьайгьай, гIемерисеб гьеб бараб букIуна парахатаб ва берцинаб рокъосезул горсвериялда. Гьеб рахъалъги талихIав чи вуго Дибир-хIажи. ЧIужу Паригун цадахъ гьес лъикIаб тарбия кьуна кIиявго васасе ва лъабайго ясалъе. Гьелги руго мадугьалихъ ва росуцоязда гьоркьор къадру-адаб бугел. Эбел-инсуца жалго гIадин гIаданлъи цIикIкIарал, иман бугеллъун куцалел руго жидерго лъималги.

Аллагьас икъбалги, талихIги кьейги гьезие гIумрудул нухазда. Дибир-хIажида гIумрудул 90 сон тIубайги баркун, гьарула гьесие сахлъи, жеги халатал гIумрудул сонал.
Пайзула Пайзулаев